England's Pacer Reece Topley ruled out of the rest of ICC ODI Cricket World Cup 2023:

भारतात सध्या वनडे वर्ल्डकप 2023 स्पर्धा सुरू आहे. या स्पर्धा आता जवळपास अर्धी संपली आहे. मात्र, अद्याप गतविजेत्या इंग्लंडला फारसा सूर गवसलेला नाही. त्यांनी 4 पैकी केवळ 1 सामनाच जिंकला असून 10 संघामध्ये ते सध्या 9 व्या क्रमांकावर आहेत. अशातच त्यांना आणखी एक मोठा धक्का बसला आहे.

इंग्लंडचा वेगवान गोलंदाज रिस टोप्ली या संपूर्ण स्पर्धेतूनच बाहेर झाला आहे. याबद्दल इंग्लंड क्रिकेट बोर्डाने रविवारी (22 ऑक्टोबर) माहिती दिली. टोप्लीला शनिवारी (21 ऑक्टोबर) दक्षिण आफ्रिकेविरुद्ध मुंबईतील वानखेडे स्टेडियमवर झालेल्या सामन्यात दुखापत झाली आहे.

या सामन्यात टोप्लीला त्याच्याच 9 व्या षटकात गोलंदाजी करत असताना दुखापत झाली. त्याची डाव्या हाताची तर्जनी फ्रॅक्चर झाली आहे. त्यामुळे आता तो लगेचच मायदेशी परतणार असून त्याच्या दुखापतीवर इंग्लंड आणि सरे मेडिकल टीम लक्ष ठेवून असेल.

शनिवारी दुखापत झाल्यानंतर लगेचच मैदानात त्याच्या दुखापतीवर उपचार करण्यात आले, पण त्याला मैदानातून बाहेर जाणे भाग पडले. तसेच नंतर त्याला इंग्लंडकडून फलंदाजीसाठीही उतरता आले नाही. या सामन्यात इंग्लंडचा संघ दक्षिण आफ्रिकेने दिलेल्या 400 धावांच्या आव्हानाचा पाठलाग करताना 22 षटकात 170 धावांवर सर्वबाद झाला होता.

दरम्यान, टोप्लीची इंग्लंडकडून वर्ल्डकप 2023 मध्ये चांगली कामगिरी झाली आहे. महत्त्वाचे म्हणजे दुखापत होण्याआधी त्याने दक्षिण आफ्रिकेच्या 3 विकेट्सही घेतल्या होत्या.

त्याने या स्पर्धेत 3 सामन्यात 8 विकेट्स घेतल्या होत्या. त्यामुळे तो संघासाठी महत्त्वाचा खेळाडू ठरत होता. मात्र असे असतानाच आता तो संघातून बाहेर झाल्याने हा इंग्लंड संघासाठी मोठा धक्का मानला जात आहे.

तथापि, अद्याप इंग्लंडने त्याच्या बदली खेळाडूची घोषणा केलेली नाही. पण आता जोफ्रा आर्चरला संघात घेतले जाण्याची शक्यता आहे. इंग्लंडला पुढचा सामना श्रीलंकेविरुद्ध गुरुवारी बंगळुरूला खेळायचा आहे.