मडगाव: श्रीलंकेत झालेल्या आशियाई स्कूल ब्लित्झ बुद्धिबळ स्पर्धेत भारताचे प्रतिनिधित्व करताना दोन सुवर्ण पदकासह एकूण पाच आंतरराष्ट्रीय पदके मिळविणाऱ्या मडगाव येथील दिया दिगंबर सावळ हीचे आज दाबोळी विमानतळावर उत्स्फूर्त स्वागत करण्यात आले.

( Diya Sawal of Goa won five medals in the Asian School Blitz Chess Tournament)

सावळ हिने 7 वर्षाखालील गटात वैयक्तिक व सांघिक अशा दोन सुवर्ण पदकांसह दोन रौप्य व एक कांस्य पदक प्राप्त केले होते. आज तिचे दाबोळी विमानतळावर आगमन झाल्यानंतर तिच्या स्वागतासाठी गोवा बुद्धिबळ संघटनेचे सचिव शरेंद्र नाईक, खजिनदार किशोर बांदेकर यांच्यासह समीर नाईक, ज्ञानेश्वर नाईक, सचिन आरोलकर, आशेष केणी, सुनील बाळ्ळीकर, पुंडलिक नायक, मुकेश अधिया, अनिल पाटील व दामोदर जांबावलीकर हे उपस्थित होते.

भुवनेश्वर येथील राष्ट्रीय शालेय बुद्धिबळ स्पर्धेत झाली निवड

ओडिशातील भुवनेश्वर येथे झालेल्या राष्ट्रीय शालेय बुद्धिबळ स्पर्धेत गोव्याच्या दिया सावळ हिने मुलींत सुवर्ण कमावले , त्याचबरोबर खुल्या गटात एथन वाझ याने रौप्य, तर रुबेन कुलासो याने ब्राँझपदक जिंकले. या कामगिरीमुळे गोव्याचे तिन्ही बुद्धिबळपटू आशियाई आणि जागतिक शालेय बुद्धिबळ स्पर्धेत भारताचे प्रतिनिधित्व करण्यास पात्र ठरली होती. यानंतर दियाने पाच पदके आपल्या नावावर केली आहेत.