Goa Premier League रोहन बोगाटी (4-35) व विकास सिंग (4-51) यांच्या भेदक फिरकीसमोर मडगाव क्रिकेट क्लबचा (एमसीसी) दुसरा डाव 113 धावांत गुंडाळून धेंपो क्रिकेट क्लबने गोवा प्रीमियर लीग (जीपीएल) क्रिकेट स्पर्धा दिमाखात जिंकली. सामन्याच्या तिसऱ्या व शेवटच्या दिवशी सोमवारी त्यांनी 73 धावांनी शानदार विजय नोंदविला.

तीन दिवसीय अंतिम सामना पर्वरी येथील जीसीए मैदानावर झाला. गतवर्षी धेंपो क्लबला उपविजेतेपदावर समाधान मानावे लागले होते, यंदा त्यांनी दुसऱ्या डावातील 186 धावांच्या आघाडीचे यशस्वीपणे संरक्षण केले.

रविवार दिवसअखेर एमसीसी संघाने बिनबाद 4 धावा केल्या होत्या, सोमवारी सकाळी 25 धावसंख्येवर पहिला गडी गमावल्यानंतर एमसीसीने संघाने फलंदाज ठराविक अंतराने गमावले.

रोहनची ऑफब्रेक, तर विकासची डावखुरी फिरकी साह्य करणाऱ्या खेळपट्टीवर वरचढ ठरली. रोहनने सामन्यात 102 धावांत 9 गडी टिपले. सातत्यपूर्ण अष्टपैलू कामगिरी केलेला विकास स्पर्धेचा मानकरी ठरला.

बक्षीस वितरण गोवा क्रिकेट असोसिएशनचे अध्यक्ष विपुल फडके, खजिनदार दया पागी, संयुक्त सचिव रुपेश नाईक, क्रिकेट प्रशिक्षण व कार्यवाही संचालक प्रकाश मयेकर, जीसीए ज्युनियर क्रिकेट संचालक प्रशांत काकोडे, धेंपो क्लबचे राजेश धेंपे व अनंत कामत यांच्या उपस्थितीत बक्षीस वितरण झाले.

संक्षिप्त धावफलक

धेंपो क्रिकेट क्लब, पहिला डाव ः 157 व दुसरा डाव ः 205 विजयी विरुद्ध मडगाव क्रिकेट क्लब, पहिला डाव ः 176 व दुसरा डाव ः 48.1 षटकांत सर्वबाद 113 (सुमीरन आमोणकर 18, प्रथमेश गावस 18, दर्शन मिसाळ 21, कीथ पिंटो नाबाद 15, विकास सिंग 4-51, रोहन बोगाटी 4-35, यश पोरोब 1-11).

वैयक्तिक कामगिरी

• सर्वाधिक धावा: दीपराज गावकर ः 5 डावात 65.80च्या सरासरीने 329 धावा

• सर्वाधिक बळी: दर्शन मिसाळ ः 8 डावात 15.58 ची सरासरी व 2.93 च्या इकॉनॉमीने 33 विकेट

• सर्वोत्तम अष्टपैलू: विकास सिंग ः 7 डावांत 78.75 च्या सरासरीने 315 धावा, 18.52ची सरासरी आणि 2.58 च्या इकॉनॉमीने 25 विकेट