Cricket Umpire Murdered in Visakhapatnam: आंध्र प्रदेशातील विशाखापट्टणममध्ये एका स्थानिक क्रिकेट स्पर्धेचा अंत अत्यंत भयावह आणि दुःखद झाला. अवघ्या 21 वर्षांच्या एका तरुण अंपायरला आपल्या जीवाला मुकावे लागले. एका रनआऊटच्या निर्णयावरुन खेळाडूंमध्ये सुरु झालेल्या वादात एका प्रेक्षकाने हस्तक्षेप करत अंपायरवर चाकूने जीवघेणा हल्ला केला. या धक्कादायक घटनेमुळे क्रीडा विश्वात खळबळ उडाली असून स्थानिक खेळांच्या आयोजनातील सुरक्षेचा प्रश्न पुन्हा एकदा ऐरणीवर आला.

ही घटना 5 एप्रिलच्या रात्री घडली. डोला अजित बाबू नावाचा 21 वर्षीय तरुण आपला सहकारी अंपायर बुडुमुरी चिरंजीवी याच्यासोबत सामन्यात अंपायरची भूमिका बजावत होता. सामन्यादरम्यान एका वादग्रस्त रनआऊटच्या निर्णयावरुन खेळाडूंमध्ये तणाव निर्माण झाला. पोलिसांनी (Police) दिलेल्या माहितीनुसार, सुरुवातीला दोन्ही अंपायरनी मध्यस्थी करुन खेळाडूंना शांत केले आणि सामना विनाव्यत्यय पूर्ण झाला. मात्र, मैदानाबाहेर हा वाद शमेल असे वाटत असतानाच परिस्थितीने वेगळे वळण घेतले.

सर्कल इन्स्पेक्टर मल्लेश्वरा राव यांनी सांगितले की, सामना संपल्यानंतर मैदानातील प्रेक्षकांमध्ये बसलेला 26 वर्षीय कांता किशोर नावाचा तरुण संतापला. त्याचा सामन्याशी थेट संबंध नव्हता, तरीही तो अंपायर आणि खेळाडूंना शिवीगाळ करु लागला. सामना संपल्यावर किशोरने अंपायरना हा वाद मिटवण्यासाठी दुसऱ्या ठिकाणी बोलावले. जेव्हा अजित बाबू आणि चिरंजीवी त्या ठिकाणी पोहोचले, तेव्हा पुन्हा एकदा त्यांच्यात बाचाबाची सुरु झाली. वादाचे रुपांतर हाणामारीत झाले आणि अचानक किशोरने आपल्या खिशातून चाकू काढून दोन्ही अंपायरवर हल्ला चढवला.

या हल्ल्यात अजित बाबूच्या छातीवर चाकूचा खोल वार झाला आणि तो रक्ताच्या थारोळ्यात कोसळला. त्याला वाचवण्यासाठी पुढे आलेल्या चिरंजीवीलाही दुखापत झाली. पीडित कुटुंबाने आरोप केला की, आरोपी किशोर हा नशेच्या अवस्थेत होता आणि त्याने आधीही आक्रमक वर्तन केले होते. अजित बाबूच्या भावाने सांगितल्यानुसार, "किशोर आरडाओरडा करत वाद घालत होता आणि अचानक त्याने खिशातून चाकू काढून डोला अजितच्या छातीत खुपसला."

हल्ल्यानंतर अजित बाबूला तातडीने रुग्णालयात नेण्यात आले, मात्र दुर्दैवाने त्याचा जीव वाचू शकला नाही. अपोलो रुग्णालयातील डॉक्टरांनी त्याला मृत घोषित केले. या घटनेनंतर आरोपी किशोर तिथून फरार झाला असून पोलीस त्याचा शोध घेत आहेत. विशाखापट्टणम पोलिसांनी हत्येचा गुन्हा दाखल केला असून आरोपीला पकडण्यासाठी शोधमोहीम तीव्र केली. खेळाच्या मैदानावरील या क्रूर कृत्याने संपूर्ण परिसरात भीतीचे आणि संतापाचे वातावरण आहे.