Ishan Kishan: शनिवारी झालेल्या बांगलादेश विरुद्ध भारत यांच्यातील वनडे मालिकेतील अखेरच्या सामन्यात भारताने 227 धावांनी विजय मिळवला आणि व्हाईटवॉश टाळला. भारताच्या या विजयात सर्वात मोठा वाटा राहिला तो ईशान किशनचा. त्याने विक्रमी द्विशतकी खेळी केली. या विजयानंतर त्याने त्याच्या फलंदाजीबद्दल प्रतिक्रियाही दिली.

ईशानने या सामन्यात 131 चेंडूत 24 चौकार आणि 10 षटकारांसह 210 धावांची खेळी केली. त्याने 126 चेंडूत त्याचे द्विशतक पूर्ण केले होते. त्यामुळे तो सर्वात जलद वनडे द्विशतक करणाराही खेळाडू ठरला. विशेष म्हणजे त्याने भारताच्या डावातील 35 षटके पूर्ण होण्यापूर्वीच हे द्विशतक केले होते. तो 36 व्या षटकात बाद झाला.

त्याबद्दल तो म्हणाला, 'फलंदाजीसाठी खेळपट्टी चांगली होती. माझा हेतू स्पष्ट होता. चेंडू जर माझ्या क्षेत्रात असेल, तर मी तो मारणार. माझे नाव दिग्गजांच्या पंक्तीत आलेले पाहून मला छान वाटत आहे. मला अजूनही वाटतंय की 15 षटके बाकी होती. मी 300 धावाही करू शकलो असतो.'

ईशानने त्याच्या खेळीसाठी विराट कोहली आणि सूर्यकुमार यादव यांनाही श्रेय दिले. तो म्हणाला, 'विराट भाईबरोबर फलंदाजी करणे चांगले होते. त्याला खेळ चांगला समजतो. मी जेव्हा नव्वदीत होतो, तेव्हा तो मला शांत करत होता. मला षटकार मारायचा होता. पण त्याने मला सांगितले की हे माझे पहिलेच शतक आहे, तर एकेरी-दुहेरी धावा काढ.'

'माझे सूर्या भाईबरोबरपण बोलणे झाले होते. त्याने मला सांगितले होते की जेव्हा तू सामन्याआधी फलंदाजी करशील, तेव्हा तुला चेंडू नीट दिसेल. मी खूप दबाव घेतला नाही. मला फक्त संधीचा फायदा घ्यायचा होता.'

ईशानबरोबर विराटनेही या सामन्यात शतकी खेळी केली. विराट आणि ईशान यांच्यात दुसऱ्या विकेटसाठी 290 धावांची भागीदारीही झाली. त्यामुळे भारताने प्रथम फलंदाजी करताना 50 षटकांत 8 बाद 409 धावा केल्या होत्या. त्यानंतर बांगलादेशला 410 धावांचा पाठलाग करताना सर्वबाद 182 धावाच करता आल्या.