Coco Gauff Win US Open 2023:

शनिवारी अमेरिकेच्या 19 वर्षीय कोको गॉफने अमेरिकन ओपन 2023 स्पर्धेतील महिला एकेरीचे विजेतेपद जिंकले. हे तिचे कारकिर्दीतील पहिलेच ग्रँडस्लॅम विजेतेपद ठरले. तिला या विजेतेपदाबद्दल जवळपास 25 कोटी रुपये बक्षीस रक्कम मिळाली.

कोको गॉफने अंतिम फेरीत दुसऱ्या मानांकित आर्यना सबालेंकाला पराभूत केले. 2 तास 6 मिनिटे चाललेल्या अंतिम सामन्यात कोको गॉफने सबालेंकाला 2-6, 6-3, 6-2 अशा फरकाने तीन सेटमध्ये पराभूत केले.

गॉफ या 21 व्या शतकात अमेरिकन ओपनचे विजेतेपद जिंकणारी पहिली किशोरवयीन (Teenager) टेनिसपटू आहे, तसेच एकूण तिसरी टेनिसपटू आहे. यापूर्वी अखेरचे 1999 साली सेरेना विलियम्सने किशोवयीन असताना अमेरिकन ओपनचे विजेतेपद जिंकले होते.

पहिले ग्रँडस्लॅम जिंकल्यानंतर कोको गॉफला आनंदाश्रू अनावर झाले होते. तिने काही वर्षांपूर्वी सेरेनाला अमेरिकन ओपनचे विजेतेपद जिंकताना पाहिले होते, आता ती स्वत: ग्रँडस्लॅम विजेती झाल्याने तिला आनंद गगनात मावेनासा झाला होता.

यावेळी तिचे कुटुंबिय देखील स्टेडियममध्ये उपस्थित होते. यावेळी तिला विजेतेपद जिंकलेले पाहून तिच्या वडिलांनीही आनंदश्रू आवरता आले नव्हते.

दरम्यान अंतिम सामन्यात सहाव्या मानांकित गॉफ आणि सबालेंका या दोघींकडूनही काही चूका झाल्या होत्या. पहिल्या सेटमध्ये गॉफ संघर्ष करत होती. तर पुढील आठवड्यात जागतिक क्रमवारीत अव्वल क्रमांकावर येणारी सबालेंकाने सुरुवात चांगली केली होती.

पहिल्या सेटमध्ये सबालेंकाने 2-0 अशी आघाडी घेतलेली. पण गॉफने पुनरागमन करत 2-2 अशी बरोबरी साधली. पण नंतर सबालेंकाने तिचा खेळ उंचावला आणि पहिला सेट जिंकला.

दुसऱ्या सेटमध्ये गॉफने चांगले पुनरागमन केले. तिने कमी चूका करताना ती खेळात कायम राहिल याची काळजी घेतली. तिने हा सेट जिंकत सामन्यात बरोबरी साधली. त्यामुळे सामना निर्णायक तिसऱ्या सेटमध्ये गेला.

तिसऱ्या सेटमध्येही गॉफने लय कायम राखली आणि सबालेंकाला वरचढ होऊ दिले नाही. तिने 4-0 अशी आघाडी घेतली होती. त्यानंतर सबालेंकाने प्रतिकार केला. मात्र, गॉफने मिळवलेली पकड ढिली होऊ न देता सेट जिंकत सामना जिंकला आणि आपले पहिले ग्रँडस्लॅम विजेतेपद मिळवले.