पणजी: मोहिमेची सुरवात तीन गुणांसह करणे मानसिकदृष्ट्या महत्त्वाचे ठरते आणि आत्मविश्वासही बळावतो, असे सांगत चेन्नईयीन एफसीचे प्रशिक्षक बोझिदार बँडोविच यांनी इंडियन सुपर लीग (ISL) फुटबॉल (Football) स्पर्धेच्या आठव्या मोसमात आणखी विजय नोंदविण्याचा आशावाद व्यक्त केला. दोन वेळच्या माजी विजेत्या संघाची उद्या सोमवारी फातोर्डा येथील पंडित जवाहरलाल नेहरू स्टेडियमवर नॉर्थईस्ट युनायटेडविरुद्ध लढत होईल.

चेन्नईयीनने मागील लढतीत हैदराबाद एफसीला चुरशीच्या लढतीत १-० फरकाने हरविले. व्लादिमिर कोमन याने पेनल्टी फटक्यावर केलेला गोल निर्णायक ठरला होता. खलिद जमिल यांच्या मार्गदर्शनाखालील गुवाहाटी नॉर्थईस्ट युनायटेड संघ स्पर्धेत पहिल्या विजयाच्या शोधात आहे. त्यांना बंगळूर एफसीकडून २-४ फरकाने हार पत्करावी लागली, नंतर केरळा ब्लास्टर्सविरुद्ध गोलशून्य बरोबरीवर समाधान मानावे लागले. सध्या चेन्नईयीनचे एका लढतीतून तीन गुण असून नॉर्थईस्टच्या खाती दोन लढतीनंतर एक गुण आहे.

नॉर्थईस्ट युनायटेडने अजून विजय नोंदविला नसला, तरी चेन्नईयीनचे प्रशिक्षक त्यांना कमी लेखण्यास तयार नाहीत. उद्याचा सामना सोपा नसेल. आम्हाला मानसिकदृष्ट्या सक्षमपणे पूर्ण शिस्तीत खेळावे लागेल, असे बँडोविच यांनी नमूद केले.

आमने-सामने

- एकूण सामने: 14, चेन्नईयीन विजयी: 3, नॉर्थईस्ट विजयी: 6, बरोबरी: 5

- गोल नोंदविले: चेन्नईयीन: 21, नॉर्थईस्ट: 25