MS Dhoni signs autograph for Sunil Gavaskar: इंडियन प्रीमियर लीग २०२३ स्पर्धेत रविवारी चेन्नई सुपर किंग्स विरुद्ध कोलकाता नाईट रायडर्स संघात सामना झाला. एमए चिदंबरम स्टेडियमवर (चेपॉक स्टेडियम) झालेल्या या सामन्यात कोलकाताने ६ विकेट्सने विजय मिळवला. पण असे असले तरी सामन्यानंतर चेन्नईने चाहत्यांची मने जिंकली आहेत.

हा चेन्नईने आयपीएल २०२३ हंगामातील घरच्या मैदानावरील म्हणजेच चेपॉक स्टेडियमवरील अखेरचा साखळी सामना होता. त्यामुळे चेन्नईचा कर्णधार एमएस धोनीसह संपूर्ण संघाने चेपॉक स्टेडियमची फेरी मारत चाहत्यांचे आभार मानले. यावेळी खेळाडूंनी चाहत्यांकडे संघाच्या जर्सी फेकल्या. त्याचबरोबर स्वाक्षरी केलेले टेनिस बॉलही चाहत्यांना भेट दिले.

गावसकर बनले धोनीचे फॅन

याच दरम्यान समालोचन करणारे भारताचे महान क्रिकेटपटू सुनील गावसकर पळत धोनीकडे आले आणि त्यांनी पेन धोनीसमोर करत त्याला त्यांच्या शर्टवर स्वाक्षरी करण्यासाठी त्याच्याकडे विनंती केली. धोनीनेही ही विनंती मान्य करत त्यांच्या शर्टवर स्वाक्षरी दिली. नंतर त्यांनी गळाभेटही घेतली.

गावसकर यापूर्वी अनेकदा म्हणाले आहेत की धोनीच्या खेळाचे चाहते आहेत. एकदा त्यांनी असेही म्हटले होते की त्यांच्या आयुष्याच्या अखेरच्या क्षणी धोनीने २०११ वर्ल्डकपच्या अंतिम सामन्यात मारलेला विजयी षटकार पाहायला आवडेल.

धोनीचा अखेरचा हंगाम?

दरम्यान, आयपीएल २०२३ धोनीचा खेळाडू म्हणून अखेरचा हंगाम असल्याची चर्चा गेल्या अनेक महिन्यांपासून होत आहे. त्यातच सध्या तो गुडघ्याच्या दुखापतीचाही सामना करत असल्याने या चर्चांना अधिक उधाण आले आहे. पण अद्याप धोनीने याबद्दल स्पष्टपण कोणतेही भाष्य केलेले नाही.

चेन्नईने चार वर्षांनी चेपॉकवर

खरंतर यंदा चेन्नईचा संघ तब्बल ४ वर्षांच्या प्रतिक्षेनंतर चेपॉकवर सामने खेळला. यापूर्वी अखेरचे त्यांनी २०१९ साली चेपॉकवर सामने खेळले होते. त्यानंतर कोरोनाच्या कारणाने त्यांना गेल्या चार वर्षात या मैदानावर सामने खेळता आले नव्हते.

आयपीएल २०२३ मध्ये चेन्नईने चेपॉकवर खेळलेल्या ७ साखळी सामन्यांपैकी ४ सामने जिंकले, तर ३ सामने पराभूत झाले.

चेन्नई पुन्हा खेळणार चेपॉकवर?

खरंतर आयपीएल २०२३ मधील प्लेऑफच्या फेरीतील पहिला क्वालिफायर आणि एलिमिनेटर हे दोन सामने चेपॉकवर खेळवले जाणार आहेत. त्यामुळे जर चेन्नईने २० मे रोजी होणाऱ्या दिल्ली कॅपिटल्सविरुद्धच्या सामन्यात विजय मिळवून प्लेऑफमधील स्थान पक्के केले, तर ते पुन्हा या हंगामात एक सामना चेपॉकवर खेळताना दिसू शकतात.