Babar Azam Praise Virat Kohli:

आशिया चषक 2023 स्पर्धेला सुरुवात झाली असून चाहत्यांना भारत आणि पाकिस्तान संघात होणाऱ्या सामन्याची उत्सुकता आहे. हा सामना 2 सप्टेंबर रोजी होणार आहे. हा सामना कँडीमधील पाल्लेकेले आंतरराष्ट्रीय क्रिकेट स्टेडियमवर होणार आहेत.

दरम्यान, या सामन्यापूर्वी पाकिस्तानचा कर्णधार बाबर आझमने भारताचा स्टार फलंदाज विराट कोहलीचे कौतुक केले आहे. तसेच विराटकडून शिकायला मिळालेल्या गोष्टींबद्दलही सांगितले आहे. बाबरने 2019 मध्ये विराटशी झालेल्या भेटीच्या आठवणीला उजाळाही दिला.

स्टार स्पोर्ट्सशी बोलताना बाबर म्हणाला, 'मी विराट कोहलीकडून खूप गोष्टी शिकायला मिळाल्या आहेत. जेव्हा कोहलीसारखा मोठा खेळाडू तुमच्याबद्दल बोलतो, तेव्हा तुम्हाला मोठा विश्वास मिळतो. हा माझ्यासाठी अभिमानाचा क्षण आहे.'

'मी 2019 मध्ये विराट कोहलीला भेटलो होतो. तो यशाच्या शिखरावर होता. आताही तो त्याच्या शिखरावरच आहे. मी त्याला फलंदाजी दृष्टीकोनाबद्दल काही प्रश्न विचारले आणि त्यानेही मला तपशीलवार सर्व समजावून सांगितले. मला त्याच्याकडून खूप मदत मिळाली.'

विराटने गेल्यावर्षी बाबरचे कौतुक केले होते. विराट म्हणाला होता, 'पहिल्या दिवसापासून त्याच्याकडून आदर मिळाला आहे. याक्षणी तो जगातील सर्वोत्तम फलंदाजांपैकी एक असला, तरी त्यात काहीही बदलले नाही.'

'सर्व प्रकारात खेळण्यासाठी त्याच्याकडे क्षमता आहे आणि मला त्याला फलंदाजी करताना पाहायला आवडते. मोठा खेळाडू बनल्यानंतरही त्याचा दृष्टीकोन बदललेला नाही असे खेळाडू खूप पुढे जातात.'

दरम्यान, पाकिस्तानविरुद्धच्या सामन्यावेळी बाबरला रोखण्याचा तोडगा भारतीय संघाला शोधावा लागणार आहे. कारण बाबरने आशिया चषकात नेपाळविरुद्धच्या सामन्यात 151 धावांची खेळी केली होती. तसेच तो सध्या चांगल्या फॉर्ममध्ये आहे.

भारत आणि पाकिस्तान यांच्यातील सामना 2 सप्टेंबर रोजी भारतीय प्रमाणवेळेनुसार दुपारी 3 वाजता सुरु होणार आहे.