Women's T20 World Cup: रविवारी ऑस्ट्रेलिया महिला क्रिकेट संघाने तब्बल सहाव्यांदा महिला टी20 वर्ल्डकप विजेतेपद आपल्या नावावर केले आहे.

ऑस्ट्रेलिया संघाने महिला टी20 वर्ल्डकप 2023 च्या अंतिम सामन्यात यजमान दक्षिण अफ्रिकन महिला संघाला 19 धावांनी पराभूत केले. त्यामुळे पुन्हा एकदा आयसीसी स्पर्धेत ऑस्ट्रेलियाचे वर्चस्व दिसून आले आहे.

रविवारी झालेल्या अंतिम सामन्यात ऑस्ट्रेलियाने प्रथम फलंदाजी करताना बेथ मूनीच्या 74 धावांच्या खेळीच्या जोरावर 156 धावा उभारल्या होत्या आणि दक्षिण आफ्रिकेसमोर 157 धावांचे आव्हान ठेवले होते.

पण या आव्हानाचा पाठलाग करताना दक्षिण आफ्रिकेला लॉरा वोल्वार्डच्या 61 धावांच्या खेळीनंतरही 20 षटकात 6 बाद 137 धावाच करता आल्या.

दरम्यान, ऑस्ट्रेलियन महिला संघाचा हा महिला टी20 वर्ल्डकपमधील सलग सातवा अंतिम सामना होता. त्यांनी 2010, 2012, 2014, 2016, 2018, 2020 आणि 2023 साली अंतिम सामने खेळले असून केवळ 2016 सालचा वर्ल्डकप वगळता अन्य सहाही अंतिम सामन्यात विजय मिळवत विजेतेपद नावावर केले आहे.

विशेष म्हणजे ऑस्ट्रेलियन वरिष्ठ महिला संघाचे हे एकूण 13 वे आयसीसी विजेतेपद ठरले आहे. त्यांनी सातवेळा महिला वनडे वर्ल्डकपवरही नाव कोरले आहे. त्यांनी 1978, 1982, 1988, 1997, 2005, 2013 आणि 2022 या सात वर्षी झालेल्या वनडे वर्ल्डकपवर नाव कोरले आहे.

त्यामुळे आता आयीसीसी स्पर्धांमध्ये ऑस्ट्रेलियन संघाचे वर्चस्व दिसून येत आहे. कारण ऑस्ट्रेलिया हा पहिला असा संघ आहे, ज्यांनी 20 पेक्षा अधिक आयसीसी स्पर्धेचे विजेतेपद नावावर केले आहे.

ऑस्ट्रेलियाच्या वरिष्ठ पुरुष संघानेही आत्तापर्यंत आयसीसी स्पर्धांमधील एकूण 8 विजेतीपदे आपल्या नावावर केली आहेत. पुरुष संघाने 1987, 1999, 2003, 2007 आणि 2015 वर्षी वनडे वर्ल्डकपवर नाव कोरले आहे. तसेच त्यांनी 2021 साली टी20 वर्ल्डकपही जिंकला होता. याशिवाय ऑस्ट्रेलियाने 2006 आणि 2009 साली झालेली चॅम्पियन्सन ट्रॉफी देखील जिंकली आहे.

ऑस्ट्रेलियाच्या वरिष्ठ संघांची आयसीसी विजेतीपदे -

महिला संघ -

वनडे वर्ल्डकप: 1978, 1982, 1988, 1997, 2005, 2013, 2022

टी20 वर्ल्डकप: 2010, 2012, 2014, 2018, 2020, 2023

पुरुष संघ -

वनडे वर्ल्डकप: 1987, 1999, 2003, 2007, 2015

चॅम्पियन्स ट्रॉफी: 2006, 2009

टी20 वर्ल्डकप: 2021