AUS vs PAK, U19 World Cup: पाकिस्तान विरुद्ध ऑस्ट्रेलिया अंडर-19 विश्वचषक 2024 मधील दुसरा उपांत्य सामना आज म्हणजेच 8 फेब्रुवारी रोजी विलोमूर पार्क, बेनोनी येथे खेळला गेला. शेवटच्या षटकापर्यंत हा सामना चालल्यामुळे रोमांचक ठरला. ऑस्ट्रेलियाला शेवटच्या षटकात विजयासाठी 3 धावांची गरज होती आणि पाकिस्तानला एका विकेटची गरज होती, पण ऑस्ट्रेलियाचा स्टार फलंदाज राल्फ मॅकमिलनने चौकार मारुन ऑस्ट्रेलियाला अंतिम फेरीचे तिकीट मिळवून दिले. ऑस्ट्रेलियाने एका विकेटने विजय मिळवला असून आता कांगारु संघाला अंतिम फेरीत भारताचा सामना करावा लागणार आहे. रविवारी 11 फेब्रुवारीला हा सामना खेळवला जाणार आहे.
दरम्यान, ऑस्ट्रेलिया सहाव्यांदा जेतेपदाच्या लढतीत पोहोचला आहे. आतापर्यंत ऑस्ट्रेलियाला तीन वेळा विजेतेपद पटकावण्यात यश आले आहे. भारत आणि ऑस्ट्रेलिया यांच्यात तिसऱ्यांदा अंतिम सामना होणार आहे. यापूर्वी भारताने 2012 आणि 2018 मध्ये पराभव केला होता. भारताने एकूण पाचवेळा जेतेपदाचा किताब मिळवला आहे.
दरम्यान, दुसऱ्या उपांत्य फेरीच्या सामन्यात नाणेफेक गमावल्यानंतर प्रथम फलंदाजी करताना पाकिस्तान संघाची सुरुवात अत्यंत खराब झाली आणि संपूर्ण संघ 179 धावांतच गारद झाला. पाकिस्तानच्या फलंदाजांना म्हणावी तशी कामगिरी करता आली नाही. त्यांनी अवघ्या 79 धावांत पाच विकेट गमावल्या होत्या. यानंतर अझान अवेस (52) आणि अराफत मिन्हास (52) यांनी अर्धशतके झळकावून पाकिस्तानला सन्मानजनक धावसंख्येपर्यंत नेले. पहिल्यांदा खेळताना पाकिस्तानने 48.5 षटकांत सर्वबाद 179 धावा केल्या होत्या. ऑस्ट्रेलियाकडून टॉम स्ट्रेकरने 9.5 षटकांत 24 धावांत सर्वाधिक 6 बळी घेतले.
दुसरीकडे, 180 धावांच्या लक्ष्याचा पाठलाग करताना ऑस्ट्रेलियन संघाने 164 धावांवर 9 विकेट गमावल्या होत्या. संघाला विजयासाठी 24 चेंडूत 16 धावांची गरज होती. राफ मॅकमिलनने नाबाद 19 धावा करत संपूर्ण गेमच ऑस्ट्रेलियाच्या बाजूने फिरवला. विशेष म्हणजे, मॅकमिलनला कॅलम विडलरची साथ मिळाली. कॅलम 9 चेंडूत 2 धावा करुन नाबाद राहिला. पाकिस्तानी गोलंदाज शेवटच्या षटकापर्यंत मॅचविनिंग विकेट घेण्यासाठी तळमळत राहिले, पण कांगारुंनी बाजी मारली.
अखेरच्या षटकात ऑस्ट्रेलियन संघाने 9 गडी गमावून 181 धावा करत सामना जिंकला. अशा प्रकारे कांगारु संघाने अंतिम फेरीत प्रवेश केला आहे. ऑस्ट्रेलियाकडून हॅरी डिक्सनने सर्वाधिक 50 आणि ऑलिव्हर पीकने 49 धावांची खेळी खेळली. तर पाकिस्तानकडून वेगवान गोलंदाज अली रझाने सर्वाधिक 4 बळी घेतले. फिरकीपटू अराफत मिन्हासने 2 बळी घेतले.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.