Asia Cup 2023 India vs Nepal Kandya Weather Update:

आशिया चषक २०२३ स्पर्धेत सोमवारी भारत विरुद्ध नेपाळ संघात साखळी फेरीचा सामना रंगणार आहे. श्रीलंकेतील कँडीमधील पाल्लेकेले क्रिकेट स्टेडियमवर हा सामना रंगणार आहे. अ गटातील हा अखेरचा साखळी सामना आहे.

दरम्यान, या सामन्यावर पावसाचे सावट असणार आहे. Accuweatherच्या हवामान अंदाजानुसार सोमवारी पूर्णपणे ढगाळ वातावरण असणार आहे. तसेच काही वेळ पाऊसही पडू शकतो. दरम्यान बहुतांश सामन्याच्या वेळेदरम्यान ढगाळ वातावरणच अधिक असेल.

त्यामुळे जर पावसाचा सामन्यादरम्यान मोठा अडथळा आल्यास षटकांची संख्या कमी केली जाऊ शकते किंवा सामना रद्दही होऊ शकतो.

लक्षात घेण्यासारखी गोष्ट म्हणजे भारताचा पाकिस्तानविरुद्धचा साखळी फेरीतील पहिला सामनाही पावसामुळे रद्द झाला होता. कँडीमध्येच झालेल्या या सामन्यात भारताने पहिल्या डावात पूर्ण ५० षटके फलंदाजी केली होती. मात्र, त्यानंतर पावसामुळे सामना सुरु होऊ शकला नव्हता. तसेच नेपाळने मात्र पाकिस्तानविरुद्ध साखळी फेरीत पराभवाचा सामना केला आहे.

सुपर-४ चे कसे आहे समीकरण

अ गटातून पाकिस्तानने एक विजय आणि रद्द सामन्यानंतर ३ गुणांसह सुपर-४ फेरीतील स्थान पक्के केले आहे. त्यामुळे आता सोमवारी होणाऱ्या भारत आणि नेपाळ सामन्यानंतर अ गटातून सुपर ४ फेरीत प्रवेश करणार दुसरा संघ कोणता ठरणार हे निश्चित होईल.

सध्या गुणतालिकेत नेपाळच्या खात्यात शुन्य गुण आहेत, तर भारताच्या खात्यात एका रद्द सामन्यामुळे १ गुण आहे. त्यामुळे नेपाळविरुद्धचा सामना जिंकला किंवा सामना रद्द किंवा बरोबरीत सुटला, तरी भारतीय संघ सुपर-४ फेरीत प्रवेश करेल. कारण विजय मिळवल्यास भारताचे ३ गुण होतील, तसेच जर सामना रद्द किंवा बरोबरीत सुटला, तर २ गुण होती.

मात्र, सुपर - ४ फेरीत जाण्यासाठी नेपाळला विजयाचीच आवश्यकता आहे. जर नेपाळने विजय मिळवला, तर त्यांचे २ गुण होतील आणि ते सहज सुपर-४ मध्ये जातील. मात्र सामना पराभूत झाला, तर त्यांच्या खात्यात शुन्य गुण राहतील. तसेच सामना रद्द किंवा बरोबरीत सुटला तर त्यांना एकच गुण मिळेल.