Ranji Trophy 2022-23: रणजी ट्रॉफीचा नवा हंगाम मंगळवारपासून सुरू झाला असून अर्जून तेंडुलकरने यंदा गोव्याच्या संघाकडून खेळत आहे. यासह त्याने राजस्थानविरुद्ध गोव्याकडून प्रथम श्रेणी क्रिकेटमध्येही पदार्पण केले आहे. महत्त्वाचे म्हणजे त्याच्या पदार्पणाची सुरुवातही शानदार झाली आहे.

त्याने बुधवारी राजस्थानविरुद्ध पहिल्याच डावात 7 व्या क्रमांकावर फलंदाजीला उतरत अर्धशतक झळकावले. त्याने षटकारासह 52 चेंडूत त्याचे अर्धशतक पूर्ण केले. तो सामन्याची दुसऱ्या दिवसाचे पहिले सत्र संपले, तेव्हाही नाबाद खेळत होता.

दिग्गज सचिन तेंडुलकरचा मुलगा असलेल्या अर्जूनने दुसऱ्या दिवसाच्या पहिल्या सत्राखेरीसपर्यंत 121 चेंडूत नाबाद 67 धावा केल्या आहेत. यामध्ये त्याच्या 10 चौकार आणि 1 षटकाराचा समावेश आहे.

तसेच त्याने या सामन्यात शतकी खेळी केलेल्या सुयश प्रभूदेसाईबरोबर नाबाद 119 धावांची भागीदारीही केली आहे. प्रभूदेसाई 292 चेंडूत 128 धावांवर नाबाद आहे. तसेच गोव्याने 117 षटकांत 5 बाद 320 धावा केल्या आहेत.

सचिनचा विक्रम रडारवर

सचिन तेंडुलकरनेही 34 वर्षांपूर्वी डिसेंबरमध्येच गुजरातविरुद्ध मुंबईकडून पहिला प्रथम श्रेणी सामना खेळला होता. त्यावेळी त्यानेही पहिल्याच डावात शतक केले होते. तेव्हा तो केवळ 15 वर्षांचा असल्याने असा कारनामा करणारा सर्वात युवा क्रिकेटपटूही ठरला होता.

सचिनने त्यावेळी चौथ्या क्रमांकावर फलंदाजी करताना 129 चेंडूत शतक पूर्ण केले होते. त्याने नाबाद 100 धावा केल्या होत्या. या खेळीत त्याने 12 चौकार ठोकले होते. पण हा सामना अनिर्णित राहिला होता. सचिनला दुसऱ्या डावात फलंदाजीची संधी मिळाली नव्हती.

आता 23 वर्षीय अर्जूनलाही पहिल्याच प्रथम श्रेणी सामन्यात शतकी खेळी करण्याची संधी आहे.

अर्जून हा प्रामुख्याने अष्टपैलू खेळाडू आहे. तो डाव्या हातानेच फलंदाजी आणि वेगवान गोलंदाजी करतो. यापूर्वी अर्जून मुंबई संघात होता. मात्र तिथे त्याला संधी मिळत नसल्याने त्याने यावर्षी गोव्याकडून खेळण्याचा निर्णय घेतला होता.