South Africa vs India 2nd Test at Cape Town, Aiden Markram Century:

दक्षिण आफ्रिका विरुद्ध भारत संघात केपटाऊनमधील न्यूलँड्स स्टेडियमवर कसोटी मालिकेतील दुसरा सामना बुधवारपासून (3 जानेवारी) खेळवला जात आहे. या सामन्यात दक्षिण आफ्रिकेचा सलामीवीर फलंदाज एडेन मार्करमने शतकी खेळी केली आहे.

या सामन्यात दक्षिण आफ्रिकेने पहिल्याच दिवशी दुसऱ्या डावात कर्णधार डीन एल्गार (12), टोनी डी झोर्झी (1) आणि ट्रिस्टन स्टब्स (1) या तिघांच्या विकेट्स स्वस्तात गमावल्या होत्या. तसेच दुसऱ्या दिवशीही भारतीय संघाने सुरुवातीलाच डेव्हिड बेडिंगहॅम (11), काईल वेरेयन (9), मार्को यान्सिन (11), केशव महाराज (3) यांच्याही विकेट्स झटपट घेतल्या.

मात्र, या विकेट्स जात असताना एक बाजू मार्करमने भक्कमपणे सांभाळला होता. दक्षिण आफ्रिकेने ७ विकेट्स गमावलेल्या असताना मार्करमला कागिसो रबाडाने दुसऱ्या बाजूने साथ दिली. त्यामुळे मार्करम दक्षिण आफ्रिकेचा डाव पुढे घेऊन गेला. यादरम्यान, मार्करमने 99 चेंडूत त्याचे शतक पूर्ण केले. हे त्याचे 7 वे कसोटी शतक ठरले.

इतकेच नाही, तर त्याने दक्षिण आफ्रिकेकडून कसोटीत चौथ्या क्रमांकाचे सर्वात जलद शतकही ठोकले. दक्षिण आफ्रिकेकडून कसोटीत सर्वात जलद शतक करण्याचा विक्रम एबी डिविलियर्सच्या नावावर आहे. त्याने 2010 साली सेंच्युरियनला खेळताना 75 चेंडूत शतक केले होते.

तसेच हाशिम आमलाने ८७ चेंडूत, तर डेनिस लिंडसे, जॉन्टी ऱ्होड्स आणि शॉन पोलॉक यांनी प्रत्येकी 95 चेंडूत कसोटी शतक ठोकले आहे.

दक्षिण आफ्रिकेसाठी कसोटीत चेंडूच्या तुलनेत सर्वात जलद शतक

• 75 चेंडू - एबी डिविलियर्स (विरुद्ध भारत, सेच्युरियन, 2010)

• 87 चेंडू - हाशिम आमला (विरुद्ध ऑस्ट्रेलिया, पर्थ, 2012)

• 95 चेंडू - डेनिस लिंडसे (विरुद्ध ऑस्ट्रेलिया, जोहान्सबर्ग, 1966)

• 95 चेंडू - जॉन्टी ऱ्होड्स (विरुद्ध वेस्ट इंडिज, सेंच्युरियन, 1999)

• 95 चेंडू - शॉन पोलॉक (विरुद्ध श्रीलंका, सेंच्युरियन, 2001)

• 99 चेंडू - एडेन मार्करम (विरुद्ध भारत, केपटाऊन, 2024)

दरम्यान, शतकानंतर मार्करम मोहम्मद सिराजविरुद्ध 32 व्या षटकात मोठा फटका खेळण्याच्या प्रयत्नात बाद झाला. मात्र तो बाद होईपर्यंत दक्षिण आफ्रिकेने 60 धावांपेक्षा अधिक आघाडी घेतली होती. मार्करमने 103 चेंडूत 106 धावांची खेळी केली. या खेळीत त्याने 17 चौकार आणि २ षटकार मारले.

या सामन्यात दक्षिण आफ्रिका पहिल्या डावात 55 धावांवर सर्वबाद झाले होते. तर भारताने पहिल्या डावात सर्वबाद 153 धावा केल्या होत्या. त्यामुळे भारताने 98 धावांची आघाडी घेतली होती.