Shocking Kabbadi News: मुंबईतून एक दुर्दैवी घटना समोर आली आहे. मलाडमध्ये झालेल्या एका कबड्डी स्पर्धेत खेळताना 20 वर्षीय युवकाला जीव गमवावा लागला आहे. या घटनेचा व्हिडिओ देखील समोर आला आहे.

गुरुवारी मुंबईतील मलाड येथे एक कबड्डी स्पर्धा सुरू होती. या स्पर्धेतील सामना खेळताना कार्तिकराज मल्लन हा 20 वर्षीय महाविद्यालयीन खेळाडू अचानक खाली कोसळला, त्यानंतर तो उठलाच नाही.

रिपोर्ट्सनुसार त्याला तात्काळ शताब्दी हॉस्पिटलमध्ये हलवण्यात आले होते. मात्र हॉस्पिटलमध्ये आणण्याआधीच त्याने जीव गमावल्या असल्याचे डॉक्टरांनी सांगितले. पण त्याच्या मृत्यूमागचे कारण अद्याप स्पष्ट झालेले नाही. मात्र, काही रिपोर्ट्सनुसार त्याला हृदयविराचा झटका आल्याचे सांगितले जात आहे.

समोर आलेल्या व्हिडिओतून असे दिसून येत आहे की सामना सुरू असताना कार्तिक राजने चढाई केली. त्याने प्रतिस्पर्धी संघातील खेळाडूंना स्पर्श करण्याचा प्रयत्न केला. मात्र प्रतिस्पर्धी संघाच्या खेळाडूंनी त्याची यशस्वी पकड केली. मात्र पकड झाल्यानंतर तो परत जात असताना अचानक कोसळला.

त्यानंतर सामना खेळत असलेल्या अन्य खेळाडूंनी लगेचच त्याच्याकडे धाव घेतली. या घटनेबद्दल लगेचच मलाड पोलिसांना कळवण्यात आले होते. दरम्यान आता या प्रकरणाची चौकशी मलाड पोलिस करत आहेत.

तसेच सध्या समोर आलेल्या माहितीनुसार कार्तिक राज मुंबईतील संतोष नगरमधील रहिवासी आहे. तसेच तो गोरेगावमधील विवेक कॉलेजमध्ये बी.कॉमचे शिक्षण घेत होता.

दरम्यान, यापूर्वीही अनेकदा खेळाडूंनी मैदानात अचानक कोसळल्याने जीव गमावल्याच्या घटना समोर आल्या आहेत.