पुण्यात माझ्या ऑफिसच्या आजूबाजूला उत्तम चहा मिळणारी अमृततुल्य होती. अमृततुल्य म्हणजे जिथे प्रामुख्याने फक्त चहा मिळतो. गोव्याच्या तुलनेत स्वस्त आणि चवीलादेखील उत्तम असा हा चहा आहे. गोव्यात आल्यावर, फिल्डवर फिरत असताना अशा चहाची प्रचंड उणीव भासायची. ढवळून ढवळून केलेला छान घट्ट चहा (Tea) पुण्यात कुठेही गेल्यावर सहजपणे मिळतो. रस्त्यावर उभं राहून झटपट चहा पिऊन मार्गी लागता येतं.

आतातर पुण्यात नको इतके वेगवेगळ्या पध्दतीची अमृततुल्य झाले आहेत. प्रत्येकजण आपल्यापरीने वेगळेपण जपण्याचा प्रयत्न करत आहेत. मध्यंतरी मटका चहाची टूम पुण्यात निघाली. मग ‘तंदुरी चहा’ बद्दलही कोणाकडून ऐकायला मिळालं. तंदुर रोटी माहीत होतं. तंदुरी कबाब माहीत होते, पण तंदुर चहा कधी ऐकिवात नव्हतं. काय असेल हा प्रकार याची उत्सुकता होती. परवा ऑफिसमधील एकाने तंदुर चहा (Restaurants in Goa) आता पणजीत मिळतो असं सांगितलं. मग आमची टीम लगेच संध्याकाळी तंदुर चहा प्यायला पोहोचलीच तिथे.

पणजीतली सांतिनेज भागात गणपती मंदिराजवळ ‘विमल शोरमा सेंटर’ नावाच्या हॉटेलमध्ये हा तंदुर चहा सुरू झाला आहे. शोरमा सेंटर जरी म्हणलं असलं तरी इथं अस्सल कोल्हापुरी पध्दतीचे पदार्थ मिळतात. मिसळ, पिठलं भाकरी, भरल्या वांग्याची भाजी, बटाटावडा त्यांची खासियत आहे.

आम्ही मुद्दाम तंदुर चहा प्यायला गेलो. तंदुरमध्ये गरम केलेल्या मडक्यात आधीच तयार करून ठेवलेला चहा घालून छान सळसळून मग कपात घालून देतात. त्या गरम केलेल्या मातीच्या मडक्यांची हलकीशी चव त्यात उतरते. मी आता कायम बिनसाखरेचा चहा पिते त्यामुळे मला हा चहा चांगलाच गोड लागला. पण त्याला तसं सांगितलं तर तो कमी साखर असलेला चहा देऊ शकतो. चहाची चव मात्र खूपच छान आहे. पणजीत तंदुर चहा हा प्रकारच नवीन आहे. त्यामुळे सध्या त्यालाच खूप मागणी आहे. कधी पणजीत असाल तर मुद्दाम पिऊन बघा.