Ram Temple Theme Saree: अयोध्येतील श्रीराम मंदिराचा प्राणप्रतिष्ठापना सोहळा २२ जानेवारी रोजी पंतप्रधान नरेंद्र मोदी यांच्या उपस्थित होणार आहे. यासाठी देशभरात जोरदार तयारी सुरू आहे. राम मंदिराच्या दर्शनासाठी भाविक उत्सुक आहेत. अशातच राम मंदिराच्या 'थीम'वर बनवलेल्या बनारसी साड्यांची देश-विदेशात मागणी वाढली आहे. बनारसी साड्यांच्या पल्लूला सुंदर बनवण्यासाठी विणकर काम करत आहेत. विणकरांना साड्यांवरील विविध डिझाईन्ससाठी 'ऑर्डर' मिळाल्या आहेत, ज्यात साड्यांच्या पल्लूवरील राम मंदिराच्या दृश्यांसह प्रभू रामाच्या जीवनातील देखावे दर्शविणाऱ्या डिझाइन्सचा समावेश आहे.

ऐतिहासिक वैशिष्ट्यांसह डिझाइन केलेल्या साड्यांना नेहमीच मागणी असते. परंतु राम मंदिर डिझाइन केलेल्या साड्या प्रथमच बाजारात दाखल झाल्या आहेत. राम मंदिर 'थीम' असलेल्या साड्या फॅशन जगतात खळबळ माजवण्यासाठी सज्ज आहेत. या साड्या परिधान करून 22 जानेवारी हा दिवस आपापल्या ठिकाणी साजरा करू इच्छिणाऱ्या देशातील विविध भागातील महिलांकडून 'ऑर्डर' प्राप्त झाल्या आहेत.

अयोध्या राम मंदिराच्या 'थीम'वर डिझाइन केलेल्या साड्यांवर पल्लूवर राम मंदिराचा शिलालेख आहे. या साड्या लाल आणि पिवळ्या रंगात बनवल्या गेल्या आहेत. शिलालेख सुवर्ण रंगात आहे. इतर प्रकारच्या साड्या अनेक रंगात उपलब्ध आहेत आणि अशा साड्यांवर बॉर्डवर श्री राम लिहिलेले आहे.

साडीचा तिसरा प्रकार भगवान श्रीरामाच्या बालपणापासून रावणाच्या मृत्यूपर्यंतच्या विविध लिलींचे चित्रण करतो. साडीच्या पदरावर राम दरबाराची प्रतिमा असलेल्या बनारसी साड्यांनाही मोठी मागणी आहे. राम मंदिर थीमवर आधारित साड्यांच्या ऑर्डर्स परदेशातून येत आहेत. या साड्यांची किंमत सात हजारांपासून एक लाखांपर्यंत आहे.