पणजी: राज्यात गेल्या आठवड्याभरापासून कधी पाऊस, तर कधी ऊन असा प्रकार सुरू असल्याने असंतुलीत हवामानामुळे सर्दी, खोकला, ताप येणे, अशा आजारांमध्ये मोठ्या प्रमाणात वाढ झाली आहे. या पावसाळ्याचा आनंद लुटताना आपले आरोग्य देखील सांभाळणे गरजेचे आहे. त्यासाठी योग्य ती काळजी घेणे जरूरीचे आहे. या कालावधीत मलेरिया, डेंग्यू, जुलाब होणे, तीव्र ताप, भूक न लागणे, डोकेदुखी, आदी आजार प्रामुखाने होतात, त्यामुळे पावसाळ्यात आरोग्याची योग्य काळजी घेणे गरजेचे असते.

पावसाळ्यात काय करावे

पाणी उकळून प्या - पावसाळ्यात पाणी दूषित होण्याची शक्यता जास्त असते, त्यामुळे पाणी नेहमी उकळून आणि गाळून पिणे आवश्‍यक आहे.

घरचे ताजे अन्न खा- पावसाळ्यात बाहेरचे, उघड्यावरील किंवा शिळे अन्न खाणे टाळा. गरम आणि ताजे अन्न घेण्यावर अधिक भर द्यावा

परिसर स्वच्छ ठेवा - घराभोवती पाणी साचणार नाही, याची काळजी घ्या. कुलर, कुंड्या, टायर यांमधील साचलेले पाणी वेळोवेळी उपसा. भांडी डब घालून ठेवा.

फळे-भाज्या धुऊनच वापरा - बाजारातून आणलेल्या भाज्या आणि फळे कोमट पाण्याने स्वच्छ धुऊनच वापरा.

डासांपासून संरक्षण - झोपताना मच्छरदाणीचा वापर करा. पूर्ण बाह्यांचे कपडे घाला आणि मॉस्किटो रिपेलेंट क्रीमचा वापर करा.

काय टाळावे?

पुराच्या किंवा साचलेल्या पाण्यातून चालणे टाळा. अपरिहार्य असल्यास, पाय ताबडतोब स्वच्छ धुवून कोरडे करा अन्यथा हे आजाराला निमंत्रण ठरू शकते.

ताप किंवा सर्दी झाल्यास स्वतःच्या मनाने कोणतीही गोळी न घेता डॉक्टरांचा सल्ला घ्या. त्यानुसारच औषधांचे सेवन करा.

रस्त्यावरील चाट, पाणीपुरी, कट केलेली फळे आणि कच्चा सॅलड खाणे पूर्णपणे टाळा.

आरोग्यदायी पावसाळ्यासाठी

हळदीचे दूध प्या - रात्री झोपताना हळद घातलेले दूध प्या, यामुळे संसर्गापासून बचाव होतो.

कशाय, काढा - खोकला आणि घशाच्या खवखवीवर उत्तम गुणकारी कशाय किंवा काढा घ्या.

रोगप्रतिकार शक्ती वाढविण्यासाठी लिंबू, आवळा, संत्री यांचा आहारात समावेश करा.

पावसाळ्यात पालेभाज्यांमध्ये कीटक असण्याची शक्यता असते, त्यामुळे त्या चांगल्या उकळून किंवा शिजवून खा.