Raksha Bandhan Auspicious Time: बहीण-भावाच्या पवित्र नात्याचा उत्सव म्हणजेच 'रक्षाबंधन'. यंदा ९ ऑगस्ट २०२५, शनिवारी श्रावण पौर्णिमेच्या तिथीवर हा सण साजरा होणार आहे. विशेष म्हणजे, यंदा सुमारे ९५ वर्षांनंतर असा शुभ योग जुळून येत आहे, जेव्हा रक्षाबंधन हा सण 'भद्रा' या अशुभ कालावधीपासून पूर्णपणे मुक्त असेल. त्यामुळे संपूर्ण दिवसभर राखी बांधण्यासाठी शुभ मानला जात आहे. मात्र, तरीही काही विशिष्ट वेळ टाळणे आवश्यक आहे, ज्यामुळे आपल्या नात्यातील प्रेम आणि समृद्धी अधिक वाढेल.

राहुकाल टाळून राखी बांधा

ज्योतिषशास्त्रानुसार, कोणतेही शुभ कार्य राहुकालात करू नये. ९ ऑगस्ट रोजी सकाळी ९:०७ ते १०:४७ पर्यंत राहुकाल असेल. हा दीड तासाचा कालावधी शुभ कार्यांसाठी योग्य मानला जात नाही. त्यामुळे, बहिणींनी या वेळेत आपल्या भावाला राखी बांधणे टाळावे. राहुकाल संपल्यानंतर म्हणजेच सकाळी १०:४७ नंतर कोणत्याही वेळी राखी बांधता येईल.

सर्वात उत्तम मुहूर्त कोणता?

संपूर्ण दिवस शुभ असला, तरी राखी बांधण्यासाठी सर्वात उत्तम मुहूर्त म्हणजेच अभिजीत मुहूर्त असतो. या मुहूर्तामध्ये केलेले कार्य नेहमीच यशस्वी आणि फलदायी ठरते. यंदाचा अभिजीत मुहूर्त दुपारी १२:०२ ते १२:५० पर्यंत असेल. या वेळेत राखी बांधल्यास भावाच्या दीर्घायुष्य आणि भरभराटीसाठी ते अधिक लाभदायक ठरू शकते.