वास्को: झुआरीनगर-वास्को येथे सोमवारी (ता.१४) सकाळी दोन कुटुंबांमध्ये झालेल्या बाचाबाचीप्रसंगी एकाने घरातील तलवार आणल्याने वातावरणातील तणाव वाढला. मात्र, इतरांनी हस्तक्षेप करीत त्याची तलवार काढून घेतल्याने तणाव निवळला. या घटनेचा व्हिडिओ व्हायरल झाल्याने वेर्णा पोलिसांनी दखल घेताना त्या तलवारबहादुराविरोधात गुन्हा नोंद केला आहे. इतरांचीही चौकशी सुरू आहे.

झुआरीनगर येथील एक विवाहित जोडपे लग्नानंतर हरिद्वार येथे फिरण्यास गेले होते. याप्रकरणी मुलीच्या कुटुंबाला माहिती मिळाली. आपल्या मुलीला तेथे साध्वी करण्यासाठी नेण्यात आले, अशी गैरसमजूत करून मुलीच्या कुटुंबाने मुलाच्या कुटुंबाला सोमवारी सकाळी जाब विचारला.

यावेळी तेथे वाद निर्माण झाल्यावर बाचाबाची सुरू झाली. ही बाचाबाची रस्त्यावर सुरू असल्याने तेथे गर्दी जमली. त्यातच मुलीच्या कुटुंबातील एकाने घरातील एक गंजलेली तलवार आणली. त्यामुळे तणावात भर पडली. मात्र, तेथे काही विपरित घटना घडण्यापूर्वीच काहीजणांनी त्याच्या हातातील तलवार काढून घेतली. त्यानंतर काही वेळाने दोन्ही कुटुंबे शांत झाली.

संबंधिताविरोधात गुन्हा नोंद

या घटनेचा कोणीतरी व्हिडिओ व्हायरल केला. याप्रकरणी त्या व्यक्तीने तलवार आणल्याने तेथे इतरांच्या सुरक्षेला धोका निर्माण झाल्याने त्याच्याविरोधात गुन्हा नोंद करण्यात आला. त्या व्यक्तीला योग्य सोपस्कारानंतर अटक करण्यात येईल, असे वेर्णा पोलिसांनी सांगितले.