मडगाव : गेली दोन वर्षे कोरोना महामारीमुळे मर्यादित स्वरुपात साजरा करण्यात येत असलेला जांबावलीचा प्रसिद्ध वार्षिक गुलालोत्सव यंदा धुमधडाक्यात साजरा केला जाणार आहे. जांबावलीच्या शिमगोत्सवाला बुधवारपासून सुरुवात झाली आहे. गेले सहा दिवस विविध धार्मिक विधी आणि सांस्कृतिक कार्यक्रम हजारो भक्तांच्या उपस्थितीत आयोजित करण्यात आले होते. मंगळवारी शिमगोत्सवाचा महत्वाचा दिवस असून संध्याकाळी 3.30 वाजता श्री रामनाथ देव मंदिराच्या प्रांगणात गुलालोत्सवाला सुरुवात होणार आहे.

या गुलालोत्सवाला हजारोच्या संख्य़ेने भाविक आणि भक्तगण हजर राहणार असल्याचा अंदाज व्यक्त करण्यात येत आहे. त्यामुळे आयोजक मठ ग्रामस्थ हिंदू सभेने गुलालोत्सवाची सर्व तयारी केली आहे. शिवाय केपे पोलिसांनी वाहतूक (Traffic) आणि शिस्त राखण्यासाठीही सर्व उपाययोजना केल्या आहेत. पहाटे श्री दामोदराची पालखी रामनाथ मंदिराच्या प्रांगणात आणून ठेवली जाईल आणि दुपारी गुलालोत्सवानंतर परत आपल्या मंदिरात नेली जाणार आहे. दामोदर देवावर गुलाल उधळल्याशिवाय भक्तांनी गुलालोत्सवाला (Festival) सुरुवात करु नये असे आवाहन करण्यात आले आहे.

गुलालोत्सवानंतर रात्री 11 वाजता सांस्कृतिक कार्यक्रम आणि रात्री 12 वाजता संगीत सभा होणार आहे. बुधवारी सकाळी धुळपेटीने उत्सवाची सांगता होणार आहे. दरम्यान जांबावली परिसरात 400 पोलीस (Police) तैनात केले जाणार आहेत. मात्र देव दामोदराच्या मंदिराबाहेर थाटली जाणारी दुकाने आता जरा दूर ठिकाणी हलवण्यात आली आहेत. याजागी वाहने पार्क करण्यासाठी आणि गुलालोत्सवासाठी पुरेशी जागा उपलब्ध करण्यात आली आहे.