मडगाव: किनारी भागात पर्यटकांना हेरून लुबाडण्याच्या घटना घडू लागल्या असून झालोर बीच करमणे येथे एका फ्लॅटमध्ये राहणाऱ्या मूळ पुणे येथील पर्यटकाला चोरट्यांनी दणका देत १ लाख ८५ हजारांचा ऐवज पळविला.

या प्रकरणी अनुज कुमार सक्सेना (३३)यांनी तक्रार नोंदवली आहे. तक्रारीस अनुसरून कोलवा पोलिसांनी ‘बीएनएस’ ३०५ कलमान्वये अज्ञातांवर गुन्हा दाखल केला आहे. पोलिस निरीक्षक विक्रम नाईक यांच्या मार्गदर्शनाखाली उपनिरीक्षक मंजू वंटमुरी पुढील तपास करीत आहेत.

काल रविवारी सकाळी चोरीची वरील घटना घडली. सक्सेना राहत असलेल्या फ्लॅटचा मुख्य दरवाजा तोडून चोरटे आत शिरले व लॅपटॉप, टॅब्लेट, मोबाईल व अन्य मौल्यवान वस्तू पळविल्या.

मागाहून चोरीची घटना उघडकीस आल्यानंतर सक्सेना यांनी कोलवा पोलिस ठाण्यात रितसर तक्रार दाखल केली. पोलिसांनी घटनास्थळी जाऊन पंचनामा केला. चोरट्यांचा माग काढण्यासाठी श्वान प्रथक व ठसेतज्ज्ञांनाही पाचारण करण्यात आले.