म्हापसा: रेवोडा येथील शापोरा नदीच्या पात्रात मासेमारीचे अडकलेले जाळे सोडवताना बुडालेल्या थॉमस फर्नांडिस (३५, रा. तरमास-तळर्ण, पेडणे) या युवकाचा मृतदेह अखेर शुक्रवारी सापडला. बांबोळी येथील गोवा वैद्यकीय महाविद्यालयात शवविच्छेदन केल्यानंतर मृतदेह नातेवाईकांच्या स्वाधीन करण्यात आला.

ही दुर्दैवी घटना गुरुवारी (२ एप्रिल) दुपारी ३ च्या सुमारास घडली होती. पेडणे येथील ५ जणांचा गट रेवोडा येथे शापोरा नदीकाठी मासेमारीसाठी आला होता.

मासेमारी करत असताना नदीच्या पात्रात टाकलेले जाळे एका ठिकाणी अडकले. ते जाळे काढण्यासाठी थॉमस फर्नांडिस याने पाण्यात उडी घेतली, मात्र त्याला पाण्याचा आणि खोलीचा अंदाज न आल्याने तो बुडाला.

थॉमस बराच वेळ बाहेर न आल्याने त्याच्या मित्रांनी आरडाओरड करून स्थानिकांची मदत मागितली. त्यानंतर पोलिस आणि अग्निशमन दलाला पाचारण करण्यात आले. म्हापसा अग्निशमन दलाचे अधिकारी गणेश गोवेकर यांच्या मार्गदर्शनाखाली गुरुवारी उशिरापर्यंत शोधमोहीम राबवण्यात आली, मात्र अंधारामुळे यश आले नाही.

शुक्रवारी, सकाळी पुन्हा शोधकार्य सुरू असताना, घटनास्थळाजवळच नदीपात्रात मृतदेह तरंगताना आढळून आला. कोलवाळ पोलिसांनी मृतदेहाचा पंचनामा करून पुढील कायदेशीर प्रक्रिया पूर्ण केली.