सासष्टी: रविवारी देशभर कामगार दीन उत्साहाने साजरा करण्यात आला. मात्र राज्यातील कामगारांचे प्रश्न सोडवण्यात प्रशासनाला अजूनही यश आले नाही. मडगाव नगरपालिकेतील रोजंदारीवर काम करणाऱ्या अंदाजे 150 मजुरांना गेल्या चार महिन्यांपासून पगारवाढ करण्यात आलेली नाही. या मजुरांना रविवारी 1 मे पासून नवीन करार करुन आदेश देणे गरजेचे होते कारण त्यांचा करार 30 एप्रिल 2022 पर्यंत होता. त्यामुळे या मजुरांनी कामावर जाण्यास नकार दिला. (Workers of Margao Municipality refuse to go to work)

नगरपालिका सुपरव्हाईजराच्या म्हणण्यानुसार, 15 दिवसांपुर्वी या मजुरांच्या कामाचा नवीन आदेश काढण्यासाठी नगरपालिकेतील उच्चपदस्त अधिकाऱ्यांना कळवले होते. मात्र नेमके कुठे अडले ते आपल्याला माहित नाही. आपण नगराध्यक्षांशी बोलणी केली असून आपण सोमवारी या बद्दल निर्णय घेऊ, असे त्यांनी कळविल्याचे पर्यवेक्षकाने सांगितले. त्यामुळे आज कचरा गोळा करण्यासाठी किंवा इतर साफ सफाई करण्यासाठी जे कायमस्वरुपी कामगार आहेत त्यांनाच आपण पाठवले असे त्याने सांगितले.

रोजंदारीवरील मजुरांना जानेवारी 2022 पासून पगार वाढ झाली असून दिवसाकाठी 500 रुपयांवरुन 700 रुपये केले आहेत. मात्र गत चार महिन्यांपासून त्यांना 500 रुपयेच दिल्याचे मजुरांनी सांगितले. आम्हाला वाढीव पैसे कधी मिळणार, असा प्रश्न एका कामगाराने उपस्थित केला.