Goa Winter Update

पणजी: आठवड्याभरापासून थंडीला सुरुवात झाली आहे. पहाटे धुके आणि दवही मोठ्या प्रमाणात पडत आहे. परंतु आज सकाळी ९ पर्यंत मोठ्या प्रमाणात धुके दाटले होते, तसेच वातावरण देखील ढगाळ वाटत होते, मात्र सकाळी दहा नंतर आकाश स्वच्छ होऊन कोवळी सूर्यकिरणेही दाखल झाली असून किमान तापमानात मात्र सातत्याने वाढ होत आहे. काहीसा थंडीचा जोर मंदावला आहे.

सोमवारी राज्यात १८.६ अंश सेल्सिअस इतक्या किमान तापमानाची नोंद करण्यात आली, तर आज (शनिवारी) २१.७ अंश सेल्सिअस तापमानाची नोंद करण्यात आली. त्यामुळे राज्यात किमान तापमानाच्या तुलनेत १.१ अंश सेल्सिअस तापमानात वाढ झाली आहे. मागील आठवड्याभरात सातत्याने किमान तापमानात वाढ होत असल्याने केवळ ग्रामीण भागात खासकरून घाटालगतच्या भागात थंडी जाणवत आहे.

पुढील पाच दिवस राज्यातील हवामान कोरडे राहणार असून पहाटे धुके आणि दव पडण्याची शक्यता गोवा वेधशाळेने वर्तविली आहे. कमाल तापमानात सामान्य तापमानाच्या तुलनेत १.९ अंश सेल्सिअसने घट झाली आहे. आज किमान ३१.३ अंश सेल्सिअस तापमानाची नोंद करण्यात आली.

काजूवर परिणाम

राज्यात मोठ्या प्रमाणात थंडीला सुरुवात झाल्याने काजू-आंबा शेतकऱ्यांचा उत्साह वाढला होता. परंतु सातत्याने होणारे हवामान बदल आणि आता पहाटे मोठ्या प्रमाणात पडणाऱ्या धुक्यामुळे ऐन बहरात असलेला काजू आंब्याचा मोहोर करपू शकतो, त्यामुळे राज्यातील शेतकरी अतिशय चिंतातुर झाले आहेत.