पणजी: हरियाणातील प्रसिद्ध अभिनेत्री तथा भारतीय जनता पक्षाच्या नेत्या सोनाली फोगट (वय 42) यांचा आज मंगळवारी राज्यातील हणजुणे येथे तारांकित रिसॉर्टसमध्ये संशयास्पद मृत्यू झाला. प्रथमदर्शनी ह्रदयविकाराच्या धक्क्याने त्यांचे निधन झाल्याचा अंदाज व्यक्त होत असला तरी मृत्यूबाबत संशय व्यक्त होत आहे. सोनालीचे नातेवाईक आज रात्री उशिरा हिस्सारहून गोव्यात पोहोचले असून उद्या शवचिकित्सेनंतरच मृत्यूचे नेमके कारण स्पष्ट होईल. दरम्यान, नातेवाईकांनी या घटनेची सीबीआय चौकशीची मागणी केली आहे.

(What exactly caused the death of BJP leader Sonali)

हणजुणे पोलिसांनी दिलेल्या माहितीनुसार, सोनाली फोगाट सोमवारी (ता.22) आपली मुलगी यशोधरा (15वर्षे) त्यांचे पीए सुधीर सांगवान आणि इतर दोन मित्रांसोबत पर्यटनासाठी गोव्यात आल्या होत्या. त्या हणजुणे येथील दी ग्रॅण्ड कर्लिस या हॉटेलमध्ये मुक्कामी होत्या. 24 ऑगस्टपर्यंत गोव्यात राहून त्यानंतर त्या मुंबईला जाणार होत्या. मात्र, तत्पूर्वी सोमवारी रात्री त्या एका नाईट क्लबमध्ये गेल्या होत्या. तेथून परतल्यानंतर पहाटे अस्वस्थ वाटू लागल्याचे इतरांना सांगितले. तशा अवस्थेत त्यांना हणजुणे येथीलच सेंट ॲन्थोनी या खासगी रुग्णालयात दाखल करण्यात आले.

हरियाणात राजकीय वातावरण तापले

हरियाणातील सर्वात चर्चित मतदारसंघ म्हणून आदमपूरची नोंद आहे. येथून काही दिवसांपूर्वी माजी मुख्यमंत्री भजनलाल यांचे पुत्र कुलदीप बिष्णोई यांनी काँग्रेसच्या आमदारकीचा राजीनामा दिला. त्यानंतर त्यांनी भाजपमध्ये प्रवेश केला आहे. तर दुसरीकडे सोनाली आदमपूरच्या भाजप उमेदवारीच्या मुख्य दावेदार आहेत. सध्या आदमपूरची पोटनिवडणूक लागली असून येथून भाजपने अद्याप कोणालीही उमेदवारी दिलेली नाही. मात्र, सोनाली यांच्या आकस्मिक मृत्यूने हरियाणात खळबळ माजली आहे. त्यामुळे तेथील राजकीय वातावरणही पेटलेले आहे.

पती निधनाचे गूढ

सोनालींचे पती संजय कुमार यांचा 2016 मध्ये हिस्सार येथील फार्म हाऊसमध्ये संशयास्पद मृत्यू झाला होता. सोनालीचांही अशाच प्रकारे मृत्यू झाल्याने हरियाणात संशयाचे वादळ उठले आहे. ‘बिग बॉस 14’ या चर्चित मालिकेमध्ये त्या सहभागी झाल्यावर सोनाली यांनी आपल्या कुटुंबामधील पुरुषांच्या अचानक मृत्यूची हिस्ट्री सांगितली होती. त्यानंतर तिचा चित्रपटसृष्टी व राजकारण सोडण्याचा विचार होता. मात्र, सासूच्या इच्छेखातर त्या या क्षेत्रात कार्यरत होत्या.

सोनाली यांनी 2019 साली भाजपतर्फे आदमपूरमधून विधानसभेला काँग्रेसच्या कुलदीप बिष्णोई यांच्याविरोधात उभ्या होत्या. मात्र, त्या पराभूत झाल्या. त्यांच्या निधनाबद्दल हरियाणाचे मुख्यमंत्री मोहनलाल खट्टर यांनी दुःख व्यक्त केले आहे.