म्हापसा : धुळेर येथे खोदकाम करतेवेळी जेसीबीकडून ६०० एमएमची जलवाहिनी फुटली. परिणामी, लाखो लिटर पाण्याची नासाडी झालीच, शिवाय काही दुकानांमध्‍ये पाणी शिरले. सॉ-मीलचेही मोठ्या प्रमाणात नुकसान झाले.

ही घटना बुधवारी सांयकाळी पाचच्या सुमारास घडली. सध्या म्हापसा शहरात पेयजल खात्यातर्फे (डीडीडब्लू) नवीन जलवाहिनीचे जाळे उभारण्याचे काम हाती घेतले आहे.

त्यानुसार, करासवाडा ते धुळेर मुख्य रत्याच्या बाजूने घटनेच्या वेळी हे खोदकाम सुरू होते. त्यावेळी सिद्धार्थ हॉलसमोर जेसीबीकडून खोदकाम करताना जलवाहिनी फोडली गेली.

यामुळे ६०० एमएम क्षमतेच्या जलवाहिनीतील पाणी फवाऱ्यांसह बाहेर पडले. हे पाणी रस्त्याच्या शेजारील दुकाने, सकल भागातील सॉ-मिल व आणि वाहन पार्किंगच्या स्थळी शिरले आणि याभागात पुरसदृष्य स्थिती निर्माण झाली.