राज्यात पावसाचा जोर वाढला असतानाही डिचोली शहराला लागून असलेल्या खाण खंदकातून पंपिंग करून पाणी सोडण्यात येत आहे. हे पाणी सोडताना कोणत्याही सरकारी यंत्रणेला याची पूर्वकल्पना दिलेली नाही. यदाकदाचित पावसाचा जोर वाढला तर या पाण्यामुळे डिचोली, लामगाव आणि मुळगाव या तीन गावांना धोका निर्माण झाला आहे.

सध्या डिचोलीतील नदीला जोडणाऱ्या नाल्यात हे पाणी सोडण्यात येत आहे. एका बाजूने जोरदार पाऊस आणि दुसऱ्या बाजूने खाण खंदकातून पाणी सोडल्याने लोक भयभीत झाले आहेत.

गेल्या १५ दिवसांपासून पावसाचा कहर सुरू आहे. लामगावच्या माथ्यावरील खाणखंदक तुडुंब भरले आहे. खाणखंदकाच्या भोवतालच्या मातीचा भराव कोसळत असल्याचे आढळून येत आहे. पावसाळ्यापूर्वी आवश्यक ती प्रतिबंधात्मक उपाययोजना केलेली नाही. त्यामुळे सध्या हा खाणखंदक अत्यंत धोकादायक बनला आहे. पावसाचा जोर वाढला आणि अशाच वेगाने पाणी सोडले, तर मोठी आपत्ती कोसळण्याची शक्यता नाकारता येत नाही.

खाण सुरक्षित : ‘वेदान्ता’चा दावा

वेदान्ता कंपनीने दिलेल्या माहितीनुसार, खाणीचा भाग कोसळलेला नाही. सुरक्षिततेविषयी पूर्ण काळजी घेतली आहे. खाणीबाबत पसरवली जाणारी माहिती खोटी आहे. जबाबदार खाण व्यवस्थापनाबाबत कंपनी वचनबद्ध आहे. स्थानिकांची सुरक्षितता कंपनीने सुनिश्चित केली आहे.