Ponda Violence Case : वारखंडे-फोंडा येथील भीषण अपघातानंतर बांधकामस्थळी एका मशिनरीला आग लावण्‍यात आली होती. या प्रकरणी तसेच बांधकामस्थळी जाऊन कामगारांना मारहाण केल्‍याप्रकरणी बिट्टू, सर्वेश, बबलू आणि सुहास अशा चौघांसह सोळा जणांविरुद्ध पोलिसांनी गुन्हा दाखल केला आहे.

मशिनरीचे मालक उसगाव येथील पार्किलो रॉड्रिगीस यांनी फोंडा पोलिसांत तक्रार दाखल केली आहे. त्यात मशिनरी जाळल्याने सुमारे १ कोटी रुपयांची नुकसानी झाल्याचे म्हटले आहे.

दरम्‍यान, दोघाजणांना फोंडा पोलिसांनी ताब्यात घेतले आहे. या प्रकरणात आणखी काही लोकांना अटक करण्याची शक्यता आहे. अर्थमुव्हिंग कन्स्ट्रक्शन इक्विपमेंट ओनर्स असोसिएशनतर्फे पोलिसांत तक्रार दाखल करण्यात आली होती.

लाकडी ओंडक्यांना आग; दोघे अटकेत

शापूर-बांदोडा येथे लाकडी ओंडक्यांना आग लावल्याप्रकरणी सहाजणांविरोधात पोलिसांनी गुन्‍हा नोंदविला आहे. गेल्या रविवारी ही घटना घडली होती. त्यात सुमारे १ लाख २० हजार रुपयांचे नुकसान झाल्याचे तक्रारदार मुल्ला एयाज याने म्हटले आहे. या तक्रारीनुसार दादापीर शेख, नवाझ शेख, तबरीझ, रघुनाथ भोसले, शैलेश भोसले, जुबेर व इतर काहींविरोधात गुन्हा दाखल केला आहे. सध्या दादापीर शेख व मितेश नाईक यांना अटक केली आहे.