Maharashtra-Goa Crime News: महाराष्ट्रातील घरफोडी आणि चोरीच्या गुन्ह्यातील वाँटेड आरोपी गोव्यात असल्याची माहिती पोलिसांना मिळाली होती. महाराष्ट्र आणि गोवा पोलीसांच्या संयुक्त तपासानंतर साळगाव पोलिसांनी काल रात्री गुन्हे शाखा, युनिट 2, वसई, महाराष्ट्र पोलिसांच्या मदतीने बार्देशमधील माँटे व्हिला, सांगोल्डामधून संबंधित चोरट्याला ताब्यात घेतले आहे.

पोलीस निरीक्षक मिलिंद भुईंबर यांच्या देखरेखीखाली पीएसआय आतिकेश खेडेकर, वैभव आरोंदेकर, कॉनस्टेबल तुळशीदास गवस यांचा समावेश असलेल्या साळगाव पोलिसांच्या पथकाने एपीआय सुहास कांबळे, एएसआय संजय नवले, एचसी सुधीर नरळे, पी.सी. अमोल कोरे यांच्या नेतृत्वाखाली वसईच्या गुन्हे शाखेच्या पथकाने या आरोपीला अटक केली आहे.

संबंधित आरोपीचे नाव रोहित चेतन शेट्टी (वय 21 वर्ष) असून तो सध्या काणकामध्ये राहतो. तो मूळचा महाराष्ट्रचा असल्याचे सांगण्यात येत आहे. तो ठाणे माणिकपूर पोलीस स्टेशन कार्यक्षेत्रातील दिवसाढवळ्या एक घर फोडून चोरी केल्याच्या प्रकरणात सहभागी होता. त्याच्यावर भारतीय दंड संहितेच्या कलम 454, 457, 380 अन्वये गुन्हा क्रमांक 126/2023 अन्वये गुन्हा दाखल करण्यात आला.

पोलिसांनी दिलेल्या माहितीनुसार, महाराष्ट्रातील अनेक गुन्ह्यांच्या घटनांमध्ये त्याचा सहभाग आहे. दरम्यान, साळगाव पोलिसांनी पुढील तपासासाठी त्याला महाराष्ट्र पोलिसांच्या ताब्यात दिले आहे.