तिसवाडी: मांशेर, डोंगरी येथे येथील घन:श्याम हळर्णकर यांच्या घराची भिंत कोसळणार असा अंदाज येताच त्यांच्या सुनेने आजोशी-मंडूरचे सरपंच प्रशांत नाईक यांच्याकडे मदतीसाठी धाव घेतली आणि इतर कुटुंबीयांना तत्काळ बाहेर काढले. त्यानंतर काही मिनिटांत छत कोसळले आणि मोठी दुर्घटना टळली, असे प्रत्यक्षदर्शी प्रशांत नाईक यांनी सांगितले.

या घटनेत हळर्णकर कुटुंबाचे किमान ५ लाख रुपयांचे नुकसान झाले आहे. घराचा एक भाग कोसळल्यानंतर आता केवळ अर्धा भाग शिल्लक आहे, परंतु तो देखील जीर्ण स्थितीत असल्याने पुढे काहीही घडू शकते.

आम्हाला गणेश चतुर्थी सुद्धा साजरी करणे कठीण झाले आहे. मुख्यमंत्री डॉ. प्रमोद सावंत यांच्याकडून आम्हाला अाशा असून आपत्ती व्यवस्थापन निधीतून आम्हाला मदत करावी, असे घन:श्याम यांचे पुत्र संजय हळर्णकर म्हणाले.