वाळपई: गवाणे-सत्तरी येथील हरिजन वाड्यावर राहणाऱ्या निकिता नारायण हरिजन या विधवा महिलेच्या कुटुंबाची आर्थिक स्थिती हलाखीची असून राहायला व्यवस्थित घरही नाही. प्लास्टिक आणि चुडतांच्या झोपडीत हे कुटुंब राहते. मात्र, आरोग्यमंत्री विश्‍वजीत राणे यांनी त्यांना पक्के घर बांधून देण्याची ग्वाही दिली असून घर बांधकामाचे साहित्यही उपलब्ध केले जात आहे.

पंच सदस्य सलोनी गावकर म्हणाल्या, हरिजन कुटुंबीयांना  आरोग्यमंत्र्यांनी घर बांधून देण्याची ग्वाही दिली आहे. आता लवकर घर बांधणीला सुरुवात होणार असून  या कुटुंबीयांना आम्ही दिलेले आश्वासन पूर्ण होणार आहे. घरासाठी लागणारे साहित्य जमविण्याचे काम सुरू झाले आहे. त्यामुळे हरिजन कुटुंबाला मोठा दिलासा मिळाला आहे.

या झोपडीत वीजजोडणी घेण्याचा त्यांनी अनेकदा प्रयत्न केला. मात्र, घर चुडताचे असल्याने आग लागून दुर्घटना घडू शकते, या कारणास्तव वीज खात्याने त्यांची वीजजोडणी मंजूर केलेली नाही.  काही वर्षांपूर्वी  पंचायतीने सोलर सिस्टिम दिली होती. दोन वर्षे झोपडीत सोलरमुळे प्रकाश होता. मात्र, नंतर ही यंत्रणा बंद पडली.

मुलांना चांगले शिक्षण मिळावे, यासाठी निकिताने दोन लहान मुलींना नातेवाईकांकडे ठेवले आहे.  या भागात साप, रानटी जनावरे यांचा सर्रास वावर असतो. त्यामुळे त्यांची नेहमीच भीती भेडसावते.

परिस्थितीमुळे मुलगी शिक्षणापासून वंचित

निकिता या चार मुलांसह केवळ दोन हजार रुपयांच्या पेन्शनवर संसार चालवत आहेत. पतीचे छत्र गमावल्यापासून या कुटुंबाची स्थिती बिकट बनली आहे. घर म्हणजे प्लास्टिक आणि नारळाच्या चुडतांनी बांधलेली झोपडी. येथे वीज नाही. दिव्याच्या उजेडातच मुले अभ्यास करतात. त्यांची  मोठी मुलगी आशा ही अभ्यासात हुशार होती. मात्र, परिस्थितीमुळे तिला शिक्षण घेणे शक्य झाले नाही.

यंदाची चतुर्थी नव्या घरात

खोतोडाच्या पंच सदस्य सलोनी गावकर यांनी या कुटुंबाची हलाखीची स्थिती लक्षात घेऊन आरोग्यमंत्री विश्वजीत राणे यांना त्यांच्याविषयी माहिती दिली. त्याचक्षणी आरोग्यमंत्री राणे यांनी हरिजन कुटुंबाला स्वखर्चातून पक्के घर बांधून देण्यात येईल, असे सांगितले. त्यांनी आश्वासन दिले, की हे घर चतुर्थीपूर्वी  बांधून तुमच्या स्वाधीन करू. यंदाचा गणपती तुम्ही याच घरात पूजा. आता वीजवाहिनीचीही जोडणी मिळणार आहे. त्यामुळे हरिजन कुटुंबीयांना आशेचा किरण दिसला आहे.