काणकोण : गालजीबाग नदी किनाऱ्यावर उभारण्यात येत असलेल्या जेटीचे बांधकाम निकृष्ट दर्जाचे होत असल्याचा स्थानिकांचा आरोप आहे. हे बांधकाम सार्वजनिक बांधकाम खाते व मनोहर पर्रीकर बगल मार्गाचे कंत्राटदार यांच्यातर्फे करण्यात येत आहे.

गालजीबाग (Galjibagh) नदीवर पूल उभारल्यानंतर माशे आणि गालजीबाग या दोन्ही किनाऱ्यांवरील होडी धक्के मोडून काढण्यात आले. पूल उभारण्यापूर्वी नदी पात्र ओलांडण्यासाठी होडी सेवा होती. ती सेवा लोलये व पैंगीण पंचायतीच्या (panchayat) संयुक्त विद्यमाने करण्यात येत होती. त्यानंतर नदी परिवहन खात्यातर्फे मोटार बोट सुरू केली आहे.

माशेच्या बाजूने कंत्राटदाराने व्यवस्थित जेटी बांधून सुशोभीकरण केले. मात्र, गालजीबागच्या बाजूने करण्यात येत असलेले बांधकाम निकृष्ट दर्जाचे होत असल्याचे येथील सेबी बार्रेटो यांनी सांगितले. या जेटीचे काम व्यवस्थित करणे गरजेचे आहे. कारण, गालजीबाग नदीतील मासेमारी बोटी या जेटीवर नांगरण्यात येतात, असे गेली अनेक वर्षे गालजीबाग नदी पार करण्यासाठी होडी सेवा देणाऱ्या प्रकाश नाईक यांनी सांगितले.

सभापतींच्‍या निर्देशांकडेही दुर्लक्ष

या जेटीची बांधणी करून सुशोभीकरण करण्याची मागणी उपसभापती इजिदोर फर्नांडिस यांच्याकडे करण्यात आली होती. मात्र, पूल उभारणीच्या खर्चात त्याचा समावेश नसल्याने हे काम सार्वजनिक बांधकाम खात्याकडून करणे शक्य नसल्याने उपसभापतींनी कंत्राटदारांकडून करून घेण्याचे आश्वासन दिले होते. मात्र, कंत्राटदाराने हे काम निकृष्ट दर्जाचे करून येथील रहिवाशांची थट्टा केल्‍याचे म्‍हणणे त्‍यांचे आहे.