Vijai Sardesai on Mid Day Meal: गोव्यातील शाळांना माध्यान्ह आहार पुरविणाऱ्या गोव्यातील स्वयंसेवा गटांना डावलून सरकार गुजरात येथील एका कंपनीला या कामाचे कंत्राट देऊ पाहात आहे. मात्र गोवा फॉरवर्ड पक्ष हे होऊ देणार नाही.

या विरोधात आम्ही पावसाळी अधिवेशनात आवाज उठवू, असे गोवा फॉरवर्डचे अध्यक्ष आणि फातोर्डाचे आमदार विजय सरदेसाई यांनी सांगितले.

आज स्वयंसेवा गटाच्या सदस्यांनी गोयकार घरात सरदेसाई यांची भेट घेतली. सरकार आमच्यावर अन्याय करत असल्याचे सांगत त्यांनी सरदेसाईंकडे आपल्या मागण्यांचे गाऱ्हाणे मांडले.

त्यावर सरदेसाई म्हणाले की, मी आताच जास्त काही बोलत नाही. मात्र गोव्यातील गटांचे पोट मारून गुजरातच्या कंपनीला गोव्यात कोण आणू पाहात आहे? त्यात कोण भागीदार आहेत? त्याचा फायदा कोणाला होणार? या सगळ्यांचा भंडाफोड मी विधानसभेत करेन.

सरकार गोव्यातील गटांशी फक्त एक वर्षाचा करार करते आणि गुजरातच्या कंपनीकडे 15 वर्षांचा कंत्राट करत आहे. गटांकडून मिळणारे जेवण योग्य प्रकारचे नाही, असे सांगून हे काम गुजरातच्या कंपनीकडे देण्यात येत आहे असा आरोप सरदेसाई यांनी केला.