पणजी: माजी मंत्री मिलिंद नाईक (Minister Milind Naik Case) यांच्याशी निगडित असलेल्या कथित सेक्स स्कँडलमधील पीडित महिला आज मुरगाव पोलीस ठाण्यात हजर झाली आहे. सेक्स स्कँडलमध्ये तिचे नाव आल्याने तिने काँग्रेस नेते संकल्प आमोणकर आणि इतरांविरुद्ध अपहरण आणि खंडणीची तक्रार दाखल केली आहे. बिहारमध्ये दाखल झालेली तक्रार नंतर मुरगाव पोलीस ठाण्यात वर्ग करण्यात आली असून, मुरगाव पोलीस तिचा जबाब नोंदवणार आहेत तसेच तिला वेगवेगळ्या ठिकाणी नेऊन तक्रारीत नमूद केलेल्या घटनांची पडताळणी केली जाणार आहे.

परिणामी मुरगाव येथील वासनाकांड प्रकरणाचे पर्यावसन नगरविकास मंत्री मिलिंद नाईक (Milind Naik) यांना राजीनामा द्यावा लागला होता. काँग्रेसचे (Congress) संकल्प आमोणकर यांनी या प्रकरणा संबंधीत ध्वनिफिती, चित्रफिती व व्‍हॉट्‌सॲप संदेशांच्या पुराव्यांसह मंत्री नाईक यांच्या विरोधात पोलिस तक्रार (Police) दाखल केली होती. यानंतर विलक्षण गतीने राजकीय चक्रे फिरू लागली. हे प्रकरण कुजत ठेवले तर भाजपाला येत्या निवडणुकीत (Goa Assembly Election) जबर किंमत मोजावी लागेल याचा अंदाज पक्षश्रेष्ठींना आला आणि नाईक यांना राजीनामा देण्याच्या सूचना दिल्या गेल्या.