वेर्णा : वेर्णा पोलिसांनी केवळ २४ तासांच्या आत घरफोडीचा पर्दाफाश करत मोठं यश मिळवलं आहे. या कारवाईत प्रशांत सोनार (३५) या आरोपीला अटक करण्यात आली असून त्याच्याकडून १.३० लाख रुपयांचा चोरीस गेलेला संपूर्ण सोन्याचा ऐवज पोलिसांनी जप्त केला आहे.

मिळालेल्या माहितीनुसार, कुठ्ठाळी येथील गगन बारिक यांच्या घरातून सोन्याची साखळी, कानातले आणि लॉकेट असा ऐवज चोरीस गेला होता. घटनेची तक्रार मिळताच वेर्णा पोलिसांनी तपासाला गती दिली. गुन्ह्याच्या तपासादरम्यान संशयित आरोपी प्रशांत सोनार याच्याविषयी महत्त्वाची माहिती मिळाली.

प्रशांत सोनार हा मूळचा आसामचा रहिवासी असल्याची माहिती समोर आलीय. पोलिसांनी तांत्रिक माहिती, गुप्त तपास आणि पथकाच्या सततच्या हालचालींमुळे आरोपीला अटक करण्यात यश मिळवले. अटकेनंतर त्याच्याकडून चोरीला गेलेला संपूर्ण ऐवज हस्तगत करण्यात आला आहे.

या कारवाईत पोलिस निरीक्षक, उपनिरीक्षक तसेच तपास पथकाने मोलाची भूमिका बजावली. पोलिसांच्या वेगवान आणि काटेकोर तपासामुळे २४ तासांच्या आत गुन्हा उघडकीस आला. चोरीचा सर्व माल सुरक्षित परत मिळाल्याने गगन बारिक यांना दिलासा मिळाला आहे. वेर्णा पोलिसांची ही यशस्वी कामगिरी स्थानिक नागरिकांनी कौतुकास्पद असल्याचे म्हटलंय