मडगाव: रविवारी (ता.११) सकाळी ८ वा.च्‍या सुमारास नुवे येथे चोरीची घटना घडली. घरातील मंडळी रविवारच्या प्रार्थना सभेला गेल्‍याची संधी साधून चोरट्यांनी घरात शिरून सुवर्णालंकार व रोकड मिळून तीन लाख दहा हजारांचा ऐवज पळविला. याप्रकरणी सँड्रा गुदिन्हो यांनी पोलिसांत तक्रार दाखल केली आहे.

दरम्यान, ख्रिसमसाच्या मिडनाईट प्रार्थनेसाठी गेल्याची संधी हेरून फर्स्ट दांडो-नावेली येथे एका घरात चोरी करून दोन लाखांचा ऐवज पळविण्‍यात आला होता. याप्रकरणी नेन्‍सी फर्नांडिस यांनी मडगाव पोलिसांत तक्रार दाखल केली होती.

अजूनही या प्रकरणाचा माग लागू शकला नाही. तर, दोन दिवसांपूर्वी मडगावात मार्था मीरा या वृद्ध महिलेची भरदुपारी चोरट्याने ५० हजार रुपये किमतीची सोनसाखळी हिसकावून पळ काढला होता. या चोऱ्यांबाबत बोलताना फातोर्ड्याचे आमदार विजय सरदेसाई म्हणाले की, हे सरकारचे अपयश आहे. गस्त नाही, सुरक्षा नाही आणि कोणतीही जबाबदारी नाही. ‘कायदा आणि सुव्यवस्था’ राखण्याचा सरकारचा दावा आता पूर्णपणे उघडा पडला आहे.

तीन चोरी प्रकरणांत एकाच कारचा धागा

राज्‍यात चोरट्यांनी उच्‍छाद मांडला आहे. वेर्णा, नुवे येथे चोरट्यांनी लाखो रुपयांचा ऐवज लंपास केला. पर्रा-म्‍हापसा येथेही चोरीचा प्रयत्‍न झाला. विशेष म्‍हणजे या तिन्‍ही ठिकाणी संशयितांची एकच कार सीसीटीव्‍ही कॅमेऱ्यात कैद झाली आहे. त्‍यामुळे पोलिसांसमोर मोठे आव्‍हान उभे ठाकले आहे.

शनिवारी सायंकाळी सहा ते सव्वासातच्‍या दरम्‍यान दांडो-वेर्णा येथील मारिया मेंडिस यांचे घर फोडून चोरट्यांनी १ लाख ९० हजार रुपयांचा ऐवज लंपास केला. याच दिवशी दुसरी घटना रात्री साडेदहाच्‍या सुमारास पर्रा-म्‍हापसा येथे घडली. पण चोरट्यांचा प्रयत्‍न फसला. तिसरी घटना दुसऱ्या दिवशी म्‍हणजे काल रविवारी सकाळी आठच्‍या सुमारास नुवे येथे घडली. घरातील मंडळी रविवारच्या प्रार्थना सभेला गेल्‍याची संधी साधून चोरट्यांनी घरात शिरून सुवर्णालंकार व रोकड मिळून तीन लाख दहा हजारांचा ऐवज पळविला.