Mormugao Vendors Garbage Issue

वास्को: विक्रेते रस्त्याकडेला कुजलेली भाजी, फळे व इतर वस्तू बिनधास्तपणे टाकतात. त्यांच्याविरोधात कोणतीही कारवाई न करता, मुरगाव पालिका हा कचरा उचलते.

हे विक्रेते स्वच्छतेसंबंधी कोणतेही शुल्क मुरगाव पालिकेला देत नसल्याने पालिकेचा महिन्याकाठी ९० हजारांपेक्षा अधिक महसूल बुडतो. तो वसूल करण्यासाठी मुरगाव पालिका कोणतीही कृती करीत नसल्याने यामागे कोणते अर्थकारण आहे, यासंबंधी प्रतिक्रिया व्यक्त होत आहेत.

रस्त्यावर कचरा टाकल्यास कारवाई करण्यात येईल, असा इशारा सरकार देते; परंतु प्रत्यक्षात मुरगाव पालिका कोणतीही कारवाई न करता कचरा उचलते, हे न सुटणारे गणित आहे. एकीकडे मुरगाव पालिकेची आर्थिक स्थिती बिकट झाली आहे. सरकारने आम्हाला आर्थिक मदत करावी, अशी मागणी करणारी मुरगाव पालिका हे स्वच्छता शुल्क गोळा करण्याची मोहीम सुरू करेल काय, हा मोठा प्रश्न आहे.

शहर भागातील भाजी मार्केटात भाजी, फळे, किराणा माल, नारळ तसेच इतर माल विकणारे विक्रेते आहेत. हे विक्रेते पूर्वी आपला कचरा, कुजलेली भाजी, फळे तसेच इतर वस्तू तेथील पोस्ट कार्यालयालगतच्या मोकळ्या जागेत टाकत होते. तेथे पालिकेचा मोठा कचरावाहू ट्रक येऊन तो सर्व कचरा नेत असे. मात्र, आता चित्र वेगळे दिसते.

विक्रेत्यांनी रस्त्यावरच अतिक्रमण केल्याने तेथून लहान रिक्षाही आत जाणे कठीण झाले आहे. रस्त्यावरील अतिक्रमणामुळे कचरा गोळा करण्यासाठी ट्रक आत नेता येत नाही. त्यामुळे तेथे कचरा साठून राहू लागला होता. त्यातून मार्ग काढताना विक्रेत्यांनी सर्व कचरा एफ.एल. गोम्स मार्गावरील गोवा बागायतदार संस्थेलगतच्या रस्त्यावरच टाकण्यास आरंभ केला. त्याला मुरगाव पालिकेनेही मान्यता दिली. तेथील

जागा ही दुचाकी वाहने उभी करण्यासाठी आहे. तेथे कचरा टाकण्यात येत असल्याने काहीजण त्या कचऱ्यामध्येच वाहने उभी करतात.