Velsao Railway Track Dispute

वास्को: वेळसाव पंचायतीने रेल्वे दुपदरीकरणाचे काम बंद ठेवण्याचा आदेश दिला असतानाही शुक्रवारी (ता.७) रेल्वे विकास निगमच्या उपव्यवस्थापकाने कामगारांसह तेथे पुन्हा काम करण्याचा प्रयत्न केला. त्यामुळे तेथे तणाव निर्माण झाला.

रेल्वे विकास निगमच्या उपव्यवस्थापकाने सरपंच डायना गौवेआ यांना तुम्ही कोण, असा प्रश्र्न विचारल्याने तणावामध्ये भर पडली. मात्र, तेथे उपस्थित असलेल्या पोलिस उपनिरीक्षकाने त्या उपव्यवस्थापकाला तेथून दूर नेल्याने परिस्थिती चिघळली नाही.

तेथील मालकी हक्कासंबंधी योग्य कागदपत्रे सादर करा. तोपर्यंत काम बंद ठेवा, असा आदेश वेळसाव पंचायतीने रेल्वे विकास निगमला दिला आहे. यासंबंधी एक संयुक्त बैठक झाली होती. त्यावेळी सरपंच डायना यांनी तुम्ही आम्हाला योग्य कागदपत्रे, आराखडा द्या आम्ही संबंधित जमीनमालकांकडे बोलतो व त्यातून तोडगा काढता येतो का ते पाहू, असे सांगितले होते. त्यानंतर गेले काही दिवस काम बंद होते. मात्र, शुक्रवारी तेथे पुन्हा काम करण्यास कामगार आल्याने गावकरी जमले. त्यांनी काम करण्यास हरकत घेतली.

यावेळी तेथे सरपंच डायनाही पोहोचल्या. त्यांनी पंचायतीने काम बंद करण्याचा आदेश दिला असतानाही तुम्ही काम कसे सुरू करता असे विचारले. तेव्हा आम्हाला पंचायतीचे काही देणेघेणे नाही, असे प्रत्युत्तर त्या उपव्यवस्थापकाने दिले. त्‍यामुळे वाद उफाळला.