Vedanta Mining Transport Issue Goa Bicholim

डिचोली: ‘वेदांता’ खाणीवरील खनिजप्रश्नी पुढील सुनावणीकडे पिळगाववासीयांसह खाणीवर अवलंबून असलेले कामगार आणि ट्रकमालकांचे लक्ष लागून राहिले आहे. पिळगावच्या शेतकऱ्यांनी उच्च न्यायालयात दाखल केलेल्या याचिकेवरील पुढील सुनावणी येत्या सोमवारी (ता. २०) होणार आहे. न्यायालयाच्या निर्णयावरच ‘वेदांता’च्या खनिज वाहतुकीचे भवितव्य निश्चित होणार आहे.

खाणीवरून रात्रीची खनिज वाहतूक सध्या बंद असली, तरी दुसऱ्या मार्गाने दिवसा वाहतूक सुरू आहे. आजही (मंगळवारी) सकाळी ते सायंकाळपर्यंत खनिज वाहतूक सुरू होती. खाणीवरील रस्ता अडवल्याने खाण खात्याने दिलेल्या परवानगीनुसार ‘वेदांता’कडून सार्वजनिक रस्त्यावरून खनिज वाहतूक करण्यात येत आहे. मात्र, या रस्त्याने वाहतूक करण्यास पिळगाववासीयांची हरकत आहे. पर्यावरणीय दाखल्यात (ईसी) नोंद आहे, त्या नियमांचे पालन करूनच खनिज वाहतूक करावी, अशी शेतकऱ्यांची मागणी आहे.

‘वेदांता’ खाणीवरून रात्रपाळीत खनिज वाहतूक करण्यात येत होती. मात्र, ट्रकांची धडधड आणि हॉर्नच्या कर्णकर्कश आवाजामुळे मनःस्ताप होताना रात्रीचा धड डोळाही लागत नाही असा दावा करीत मध्यरात्री ते पहाटेपर्यंत होणाऱ्या खनिज वाहतुकीस पिळगाववासीयांनी विरोध केला. बारा दिवसांपूर्वी (ता. २) मध्यरात्रीच संतप्त नागरिकांनी रस्त्यावर उतरून खनिज वाहतूक रोखून धरली.

तेव्हापासून रात्रीची खनिज वाहतूक बंद आहे. मध्यंतरी रात्रपाळी बंद करून खनिज वाहतुकीसाठी रात्री दहा वाजेपर्यंत वेळ वाढवून द्यावी असा प्रस्ताव ट्रकमालक संघटनेने दिला आहे. मात्र, या प्रस्तावालाही विरोध करताना काळोखात खनिज वाहतूक नकोच अशी भूमिका पिळगावच्या लोकांनी घेतली आहे.