डिचोली: न्यूवाडा-वाठादेव (डिचोली) येथील खूनप्रकरणी अटक केलेल्या मैनुद्दीन हवांगी या संशयित आरोपीला दहा दिवसांचा पोलिस कोठडीचा रिमांड मंजूर झाला आहे. संशयित आरोपीला (शनिवारी) न्यायालयात हजर केले असता, न्यायालयाने त्याला पोलिस रिमांड दिला.

खुनासाठी वापरण्यात आलेली तलवार पोलिसांनी जप्त केली आहे. (शुक्रवारी) भरदिवसा न्यूवाडा-रोलिंगमिल येथे भर रस्त्यावर मैनुद्दीन हवांगी याने स्वतःची पत्नी रबिया हिच्यावर तलवारीने सपासप वार करुन निर्दयीपणे खून करण्याची घटना घडली आहे.

या घटनेनंतर मैनुद्दीन स्वतः पोलिसांना शरण आल्यानंतर डिचोली पोलिसांनी त्याला अटक केली. पोलिस अधीक्षक राहूल गुप्ता, उपअधीक्षक व्हील्सन डिसोजा आणि डिचोलीचे पोलिस निरीक्षक विजय राणे सरदेसाई यांच्या मार्गदर्शनाखाली पोलिस या खूनप्रकरणी पुढील तपास करीत आहेत.

घटस्फोटापूर्वीच हत्या

मिळालेल्या माहितीनुसार मैनुद्दीन आणि रबिया यांच्यात वाद चालूच होते. वाद पोलिसांपर्यंत पोचला होता. घटस्फोट घेण्याचेही नवरा-बायकोमध्ये निश्चित झाले होते. सोपस्कारही जवळपास पूर्ण होऊन कालच सायंकाळी घटस्फोट करारावर स्वाक्षरी होणार होती, अशी खात्रीलायक माहिती मिळाली आहे.

मात्र घटस्फोट घेण्यापूर्वीच मैनुद्दीन याने पत्नी रबिया हिला यमसदनी पाठवले. मिळालेल्या माहितीनुसार मैनुद्दीन याला ‘ड्रग्ज’सेवनाचे व्यसन होते. अशी खात्रीलायक माहिती मिळाली आहे.