Vasco Railway Station :

सासष्टी, वास्को रेल्वे स्थानकावरून दर सोमवारी वालंकिणीसाठी ट्रेन सुटते. त्यानुसार सोमवार, ६ मे रोजीसुद्धा वालंकिणीला सायबिणीच्या दर्शनासाठी वास्कोहून ट्रेन सुटणार आहे. ७ मे रोजी गोव्यात लोकसभा निवडणुकीसाठी मतदान होणार आहे.

त्यामुळे या ट्रेनवरून काही लोकांनी समाजमाध्यमांवर हंगामा सुरू केला आहे. वालंकिणीला जायला काही राजकीय नेत्यांकडून मोफत तिकीट दिले जात असल्याचा आरोप केला जात आहे.

रेल्वे प्रशासनाकडून मिळालेल्या माहितीनुसार, वास्को-वालंकिणी ट्रेनला पुष्कळ गर्दी असते. शिवाय ६ मे रोजीच्या ट्रेनसाठी दोन ते तीन महिन्यांपूर्वीच आरक्षण झाले आहे. सुमारे ८०० हून अधिक प्रवाशांचे तिकीट निश्र्चित झाले असून काही प्रवाशांची नावे प्रतीक्षा यादीत आहेत.

माजी आमदार ॲड. राधाराव ग्रासियस यांनी समाज माध्यमांवरून, ख्रिस्ती बांधवांनी कुठल्याही आमिषाला बळी न पडता मतदानाचा हक्क बजावावा, असे आवाहन केले आहे. मतदान न करणे म्हणजे पाप ठरेल, असेही त्यांनी म्हटले आहे.

पर्यावरणमंत्री तथा नुवेचे आमदार आलेक्स सिक्वेरा म्हणाले, या तीर्थयात्रेवरून कॉंग्रेस पक्ष लोकांच्या मनात विष कालवून लोकांची मने कलुषित करीत आहे. कॉंग्रेसच्या अपप्रचारावर विश्र्वास ठेवू नका, असे आवाहन सिक्वेरा यांनी आपल्या वाढदिनी केले आहे.

यात्रा सरकार पुरस्कृत नाही!

समाज कल्याण खात्याचे संचालक अजित पंचवाडकर यांच्या म्हणण्यानुसार, सरकारतर्फे ६ मे रोजीची ट्रेन पुरस्कृत केलेली नाही.

६ मे रोजी वास्को, मडगावहून वेगवेगळ्या ठिकाणी जाण्यासाठी निश्र्चित केलेल्या वेळापत्रकाप्रमाणे कित्येक प्रवासी ट्रेन सुटणार आहेत. मात्र, नेमके याच ट्रेनवरून वादंग का, असा प्रश्र्न उपस्थित केला जात आहे.

या यात्रेला सुमारे हजारभर भाविक जाणार आहेत. मात्र, दक्षिण गोव्याच्या भाजपच्या उमेदवार पल्लवी धेंपे या ६० हजारहून अधिक मताधिक्याने निवडून येणार असून वालंकिणीला जाणाऱ्या भाविकांमुळे निवडणूक निकालावर काहीच परिणाम होणार नाही.

- आलेक्स सिक्वेरा, पर्यावरणमंत्री.