Vasco Police: अमली पदार्थ बाळगल्याप्रकरणी वास्को पोलिसांनी एका तरूणाला अटक केली आहे. सनी रामशंकर केवट (वय 21 वर्षे) असे या युवकाचे नाव आहे. तो मूळचा उत्तर प्रदेशचा आहे. त्याच्याकडून 1.2 ला खरूपये किंमतीचा 1.2 किलो गांजा जप्त करण्यात आला आहे. वास्को पोलिसांनी न्यू वाड्डे येथे ही कारवाई केली.

न्यू वाडेतील लोकांकडून अमली पदार्थांची तस्करी होत असल्याच्या तक्रारी येत होत्या. त्यामुळे त्याबाबत सतर्कता बाळगण्याच्या सूचना एलआयबी पथकाला केल्या होत्या. नार्कोटिक्सशी संबंधित कारवाया येथे सुरू होत्या.

गुरूवारी रात्री या भागात गस्त घालत असताना अॅक्टिवा वरून आलेल्या एका युवकाकडे चौकशी केली. त्यावर त्याला समाधानकारक उत्तरे देता आली नाहीत. त्याचा संशय आल्याने त्याची झडती घेतली गेली. त्यावेळी त्याच्याकडून 1.2 किलो गांजा आढळून आला.

त्याबाबत त्याला काहीही सांगता आले नाही. त्यामुळे त्याला अटक करण्यात आली आहे. त्याला शुक्रवारी न्यायालयात उभे केले गेले होते. त्यावेळी न्यायालयाने त्याला पोलिस कोठडी सुनावली आहे. सध्या त्याच्याकडे चौकशी केली जात आहे.