वास्को: मुरगाव पालिका मंडळाच्या सोमवारी (ता. १३) झालेल्या साधारण सभेत कदंब बसस्थानक तात्पुरत्या स्वरूपात शहरातील एचपीसीएलने मोकळ्या केलेल्या जागेत हलविण्याचा प्रस्ताव, तसेच फॉर्म्युला ४ रेसमुळे बोगदा येथे झालेल्या रस्ते व पायाभूत सुविधांच्या तोडफोडीविषयी गरमागरम चर्चा झाली. याशिवाय नळजोडणीसाठी लागणाऱ्या कागदपत्रांची अट, पे-पार्किंग, विविध सौंदर्यीकरण प्रकल्पांसह महत्त्वाचे निर्णय बैठकीत घेण्यात आले.

नगराध्यक्ष गिरिष बोरकर यांच्या अध्यक्षतेखाली झालेल्या बैठकीस उपनगराध्यक्ष रामचंद्र कामत, मुख्याधिकारी सिध्दीविनायक नाईक, तसेच नगरसेवक-नगरसेविका आणि अधिकारी उपस्थित होते. मुख्यमंत्र्यांनी बोगदा येथील नियोजित फॉर्म्युला-४ स्ट्रीट रेस रद्द केल्याबद्दल नगरसेवक दामोदर नाईक, प्रजय मयेकर यांनी त्यांचे आणि पाठिंबा दिलेल्या सर्वांचे आभार मानले.

मात्र ट्रॅक तयार करताना रस्ते, गटार, नाले, जलवाहिन्या यांची झालेली तोडफोड अद्याप दुरुस्त का करण्यात आलेली नाही, असा सवाल त्यांनी उपस्थित केला. वेळप्रसंगी पालिकेने संबंधित यंत्रणा जप्त करण्याची कारवाई करावी, अशी मागणीही यावेळी झाली. दरम्यान, नगराध्यक्ष व मुख्याधिकारी तेथील पाहणी करणार असल्याचे सांगण्यात आले.

पालिका नळजोडणीसाठी ना हरकत दाखला देते; मात्र भोगवटा प्रमाणपत्र नसल्यास सार्वजनिक बांधकाम विभाग नळजोडणी नाकारतो. यामुळे सर्वसामान्य नागरिकांना नळजोडणी मिळण्यात अडथळा येतो आहे. त्यामुळे न्यायालयीन आदेश लक्षात घेता, या प्रक्रियेस कायदा सल्लागाराचा सल्ला घेऊन पुढील निर्णय घेण्यात येणार आहे.

इतर महत्त्वाचे निर्णय

पे पार्किंग: निविदा उघडण्यात आल्या असून लवकरच पे पार्किंग सेवा सुरू होणार.

बहुउद्देशीय मार्केट (सडा): याबाबत लवकरच निर्णय घेतला जाणार.

डॉ. बाबासाहेब आंबेडकर यांचा पुतळा: आयओसी चौकात उभारण्यात येणार.

टी.बी. कुन्हा चौक: एका खासगी कंपनीच्या सीएसआर अंतर्गत सौंदर्यीकरण होणार; वर्तुळाकार भाग कमी केला जाणार.

सेंट अँड्र्यू चौक: येथे कमान उभारण्यासाठी ना हरकत दाखला देण्यात येणार.

मासे मार्केट: शहर आणि बायणा परिसरातील मासे मार्केट्स अधिसूचित करण्यात आले आहेत.

...तर शहरातील वाहतुकीवर पडणार ताण

शहरातील कदंब बसस्थानकाचे बांधकाम सुरू होणार असल्याने, ते तात्पुरते एचपीसीएलने मोकळ्या केलेल्या पालिकेच्या जागेत हलवले जाणार आहे. यासंदर्भात इतिवृत्तात विषयाचा समावेश असताना, प्रत्यक्षात कोणतीही चर्चा न करता तो समाविष्ट कसा करण्यात आला, असा सवाल नगरसेविका प्रिया राऊत यांनी केला. शहरात बसस्थानक हलविल्यास वाहतुकीवर ताण येईल, त्यामुळे असा निर्णय घेण्यापूर्वी सर्व नगरसेवकांना विश्वासात घेणे आवश्यक आहे, असे त्यांनी स्पष्ट केले. यावर स्पष्टीकरण देताना नगराध्यक्ष बोरकर म्हणाले, की बसस्थानक हलविल्यास पालिकेला महसूल मिळेल. मात्र कोणताही निर्णय घेताना सर्व संबंधितांना विश्वासात घेण्यात येईल आणि पुढील बैठकीत यावर सविस्तर चर्चा केली जाईल.