Valpoi : उस्ते-सत्तरी येथील सरकारी बंधारा भागात दररोज मोठ्या संख्येने लोक मौजमजेसाठी येतात. पण काही बेधुंद, बेशिस्त लोकांकडून परिसर घाण केला जातो आहे. बियर, दारूच्या बाटल्या, प्लास्टिक कचरा तिथेच टाकला जातो. त्यामुळे मोठ्या प्रमाणावर बाटल्यांचा खच बंधारा परिसरात पडलेला आहे.

अशा धुमशान घालणाऱ्या व अस्वच्छता करणाऱ्या लोकांवर कडक कारवाई करण्यासाठी पावले उचलावीत, असे निवेदन उस्ते-बोडणवाडा ग्रामस्थांनी मंगळवारी (ता.१८) नगरगाव ग्रामपंचायतीला सादर केले आहे. पंचायतीचे सचिव विनायक गावकर व सरपंच संध्या खाडीलकर यांनी निवेदनाची दखल घेत उस्ते बंधारा भागात जाऊन परिसराची पाहणी केली आहे.

गोव्यातील स्थानिक लोकांकडूनच बंधाऱ्यात धुमशान घातले जात आहे. दारू प्राशन करून मोठमोठ्याने किंचाळणे, आवाज करणे, नको ती अश्‍लील भाषा वापरणे हे प्रकार केले जातात. दारू पिऊन त्या परिसरातही रिकाम्या बाटल्या फोडल्या जातात. बंधाऱ्याच्या फळ्याही फोडल्या जातात. त्यामुळे पाण्याची पातळी कमी होते आहे. त्याचा परिणाम सिंचनावर होऊ शकतो.

पंचायतीने बंधारा परिसराची पाहणी केली असता, परिसर कचऱ्याने व्यापलेला दिसून आला. येत्या काही दिवसांत परिसराची साफसफाई पंचायतीतर्फे केली जाईल व तिथे कचरापेटीची ठेवली जाईल. ग्रामस्थांनी दिलेले निवेदन पंचायतीने वाळपई पोलिस, सत्तरी उपजिल्हाधिकारी, मामलेदार, म्हादई वन विभाग यांना पाठविले आहे. बेशिस्त लोकांवर कारवाईसाठी कार्यवाही करण्याचे सूचित केले आहे.

- संध्या खाडीलकर, सरपंच, नगरगाव