वाळपई: वाळपई शहरात दिवसेंदिवस वाहतूक कोंडीची समस्या जटील झालेली आहे. त्यामुळे वाहन चालकांना त्याचा मनस्ताप सहन करावा लागत आहे. मंगळवारी सायंकाळी ६.३० वाजताच्या दरम्यान वाळपई मुख्य बाजारात वाहनांच्या रांगा दिसून आल्या. वाळपई पणजी मार्गावर ही कोंडी अधिक प्रमाणावर झाली होती. त्यामुळे लोकांना याचा नाहक त्रासाला सामोरे जावे लागले.

वाळपई शहरात अनेक वर्षापासून वाहतूक आराखडा तयार केलेला जातो. त्यासंबंधी बैठकाही घेतल्या गेल्या आहेत. कागदावर,फलक लावून कार्यवाही केली जाते. पण, प्रत्यक्षात त्याची अंमलबजावणी केली जात नाही. त्यामुळे वाहतूकीचा खोळंबा होत आहे.

सध्या वाळपई शहरात रस्त्यालगत सरकारी कामे सुरु आहेत. रस्ते खोदून जलवाहिनी घालण्याची कामे हाती घेण्यात आलेली आहेत. शहरात अंतर्गत, मुख्य रस्ते खणले आहेत. पाईप लाईन घालून रस्ते मातीने भरले जातात. चांगले रस्ते खणले जात आहेत.

वाळपई पोलीस स्थानक क्षेत्र ते पणजी मार्गावरील प्रथम दंडाधिकारी न्यायालयापर्यंत रस्त्याच्या बाजूंनी ‘नो पार्किंग झोन’ असे सूचना करणारे फलक बसविण्यात आले आहेत. त्यामुळे ‘नो पार्किंग’ ची अंमलबजावणी प्रत्यक्षात उतरविण्याची गरज आहे. परंतु वाढती वाहनांची संख्या व वाळपई शहरातील कमी जागा अशा अवस्थेत या सूचनांचे पालन वाहन चालकांकडून होणे कठीण होऊन बसले आहे.

वाहतूक व्यवस्थापन ढासळलेले

सत्तरी जागरूक युवा मंचच्या कार्यकत्यांनी वाळप‌ईतील वाहतूक समस्येबाबत उपजिल्हाधिकारी व इतर संबंधित कार्यालयात पाठपुरावा करून वाळप‌ईसाठी २०१८ मध्ये वाहतूक आराखडा पास करून घेतला होता. पण, अजुन त्याची कार्यवाही करण्यात आली नाही.

वाळपईत नावापुरते फलक लावण्यात आले आहेत. पण, कार्यवाही कुठेच नाही. हल्लीच एक युवक खड्ड्यात मोटरसायकल घेऊन पडून गंभीर जखमी झाला होता. आपण याविषयी हल्लीच डिचोलीचे वाहतूक अधिकारी पराडकर यांच्याशी बोललो आहे, असे सत्तरी जागरुक युवा मंचचे विश्वेश प्रभू यांनी सांगितले.