Valpoi News :

वाळपई, सत्तरी तालुक्यात सध्या वीज दुरुस्ती कामानिमित्त वीज खंडित केली जात आहे. तरी देखील रात्री विजेचा लपंडाव काही थांबलेला नाही.

सकाळी वीज दुरुस्तीसाठी ‘शटडाऊन’ आणि रात्रीचा विजेचा लपंडाव अशी स्थिती असल्याने भर उन्हाळ्यात उष्म्याने हैराण झालेल्या नागरिकांनी तीव्र संताप व्यक्त केला आहे.

वातावरणात प्रचंड उकाडा वाढला आहे. ऐन निवडणुकीच्या कालावधीत विकासाचा उदो उदो केला जात आहे, तर दुसरीकडे लोकांना पायाभूत सुविधाही दिल्या जात नाहीत.

गेले काही दिवस सत्तरीच्या ग्रामीण भागात विजेचा लपंडाव वाढला आहे. नगरगाव पंचायत क्षेत्रात नवीन वीजवाहिनी घालण्याचे काम प्रगतिपथावर आहे. तरीही नगरगाव पंचायत क्षेत्रात विजेचा लपंडाव सुरू होता. रात्रीदेखील वीज गुल होते.

भर उन्हाळ्यात नियमित वीजपुरवठा करणे गरजेचे आहे. मंगळवारी दिवसभर वीज नव्हती. वीज मिनिटभर आली की, लगेच जाते. त्यामुळे आधीच उकाड्याने हैराण झालेली जनता अधिकच त्रस्त झाली आहे. सरकारी यंत्रणेने यावर कार्यवाही करणे आवश्यक आहे.

- शिवाजी देसाई, ब्रह्मकरमळी.