डिचोली: १४ फेब्रुवारी हा दिवस 'व्हेलेंटाईन डे' अर्थातच प्रेमाचा दिवस म्हणून साजरा केला जातो. या दिवशी प्रेमीयुगुलांसह ज्येष्ठ दांपत्येदेखील एकमेकांवर प्रेम व्यक्त करून या दिवसाच्या एकमेकांना शुभेच्छा देतात. एकाबाजुने ''व्हॅलेंटाईन डे''चा उत्साह असतानाही ''व्हॅलेंटाईन''चे प्रतीक असलेले गुलाबांवर मात्र संक्रांत आली आहे. 'व्हेलेंटाईन डे' असतानाही गुलाबांच्या मागणीत मोठी घट दिसून येते.

सोशल मिडिया आणि अन्य माध्यमातून प्रेम व्यक्त करण्याचे प्रमाण वाढल्याने गुलाबांना मागणी घटली आहे, असे डिचोली बाजारातील फूल विक्रेत्यांचे म्हणणे आहे. एक काळ असा होता की, 'व्हॅलेंटाईन डे' म्हटला की, डिचोलीचा फूल बाजार ''व्हेलेंटाईन डे''च्या पुर्वदिनीच गुलाबाच्या फुलांनी खुलून जात असे.

गुलाबांना प्रचंड मागणी असायची. पुर्वदिनीच बाजारातून गुलाब गायब होत असे, मात्र 'कोविड' महामारीनंतर गुलाबांच्या मागणीवर हळूहळू परिणाम होत गेला. ''कोविड''महामारी संपुष्टात आली, मात्र गुलाबांच्या मागणीत झालेली घट आजही कायम आहे, असे फूल विक्रेत्यांचे म्हणणे आहे. 'व्हेलेंटाईन डे'च्या पुर्वदिनी सायंकाळपर्यंत डिचोलीच्या बाजारात गुलाब फुलांना मोठी मागणी दिसून आली नाही.

समाज माध्यमांचा परिणाम

'कोविड' महामारीनंतर 'व्हेलेंटाईन डे'ला गुलाबांची मागणी कमी झाली आहे. त्यात आजच्या डिजिटल जमान्यात समाज माध्यमाद्वारे प्रेम व्यक्त करण्याचे साधन हातात असल्याने गुलाब विकत घेउन प्रेम व्यक्त करण्याचे दिवस आता मागे पडले आहेत. पूर्वी बाजारात गुलाबांचा खच पडायचा. मात्र आता गुलाबांना मागणी नसल्याने विक्रेतेही कमी फुले मावतात, असे रूपा आणि राजेंद्र मयेकर या फूलविक्रेत्यांनी सांगितले.