पेडणे: वळपे-विर्नोडा येथील नीलेश प्रभाकर आरोंदेकर यांच्या राहत्या घरात झालेल्या घरफोडीत चोरट्यांनी सुमारे सात लाख रुपयांचे सोन्याचे दागिने आणि एक लाख रुपयांची रोकड लंपास केल्याची घटना उघडकीस आली आहे. या प्रकरणाची नोंद पेडणे पोलिस ठाण्यात करण्यात आली आहे.

तक्रारदार नीलेश प्रभाकर आरोंडेकर यांनी दिलेल्या माहितीनुसार, ६ ऑक्टोबर रोजी सकाळी ते आणि त्यांची पत्नी नोकरी व व्यवसायानिमित्त घराबाहेर गेले होते, तर त्यांचा मुलगा कॉलेजसाठी निघाला होता. दुपारी कॉलेजवरून परतल्यावर मुलाला घराचा दरवाजा उघडा दिसला. त्याने तत्काळ आई-वडिलांना फोन करून याची माहिती दिली.

यानंतर आरोंडेकर दाम्पत्य घरी परत आले असता, घरातील कपाटे अस्ताव्यस्त अवस्थेत दिसली. तपासणी केली असता कपाटातील सोन्याचे मंगळसूत्र, बांगड्या, कानातील डूल, गळ्यातील साखळी असे एकूण सुमारे सात लाख रुपयांचे दागिने तसेच एक लाख रुपयांची रोकड चोरीला गेल्याचे स्पष्ट झाले.

चोरट्यांनी नेमकी कोणत्या मार्गाने घरात प्रवेश केला आणि चोरीसाठी कोणती साधने वापरली याबाबत पोलिसांकडून तपास सुरू आहे. पेडणे पोलिसांनी घटनास्थळी भेट देऊन पंचनामा केला असून शेजारच्या परिसरातील सीसीटीव्ही फूटेजची तपासणी सुरू आहे.

पोलिसांनी अज्ञात चोरट्यांविरुद्ध गुन्हा नोंदवून पुढील तपास सुरू केला आहे. या घटनेमुळे परिसरात एकच खळबळ उडाली आहे.