फोंडा: दूधसागर नदीत उत्तराखंड येथील तरुण बुडाल्याची घटना उघडकीस आली आहे. मित्रांसोबत नदीत पोहण्यासाठी आले असता तरुण पाण्यात उतरला आणि अचानक गायब झाला.रविवारी (१६ फेब्रुवारी) ओकांब-धारबांदोडा येथे ही घटना घडली.

विक्रांत रावत (वय २५, रा.तिस्क- उसगाव, मूळ उत्तराखंड) असे या तरुणाचे नाव आहे. रविवारी सुट्टी असल्याचे विक्रांत त्याच्या मित्रांसोबत ओकांब-धारबांदोडा येथे दूधसागर नदीत आंघोळीसाठी गेला होता. विक्रांत पोहण्यासाठी पाण्यात उतरला खरा पण अचानक तो गायब झाला.

विक्रांतचा त्याच्या मित्रांनी शोध घेण्याचा प्रयत्न केला पण त्याचा शोध लागला नाही. अग्निशामक दलाने शोध घेण्याचा प्रयत्न केला पण तो सापडू शकला नाही. रविवारी रात्री शोधकार्य थांबवल्यानंतर सोमवारी सकाळी पुन्हा शोध सुरु केल्यानंतर अखेर दुपारी रावतचा मृतदेह आढळून आला आहे.

अग्नीशामक दल व फोंडा पोलीस विक्रांतचा शोध घेत होते.उत्तरीय तपासणीसाठी मडगाव येथे हॉस्पिसियोत पाठविला आहे. पुढील तपास फोंडा पोलीस करीत आहे.